.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 197
Hüküm no: 155
Orijinal metin no: [38a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ayder b. Baragat’ın Avanos’ta olan alacağını vekili Serkis v. Bağdasar’dan tahsil ettiği

Husûs-ı âti’l-beyânın mahallinde tahrîri iltimâs olunmağın savb-ı şer‘den irsâl olunup ol dahi Hezarfen Hüseyin Efendi’nin mahmiye-i İstanbul’da Fethiye câmi‘-i şerîfi kurbunda vâki‘ sâkin olduğu menziline varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde meclis-i [38b] ma‘kūd-ı mezbûrda Koyrova? cemâ‘atinden [Ayder v. Baragat] husûs-ı âti’l-beyâna vekîl olduğu bimâ hüve nehci’s-sübût şer‘an sâbit olan hayyât tâ’ifesinden Serkis v. Bağdasar nâm zimmî mahzarında ikrâr-ı tâm ve takrîr-i kelâm edip gāib-i mezbûr Avanos zimmetinde cihet-i karz-ı şer‘îden yüz kırk iki buçuk guruş hakkım olup ve Abdülkādir Efendi nâm kimesneye dahi deyni olan yüz kırk iki buçuk guruşa ve Tavake nâm yahudi’ye deyni olan yirmi üç guruşa dahi ben kefîl bi’l-mâl olmağla cem‘an kefîl olduğum yüz altmış beş buçuk guruşu mezbûr Abdülkādir Efendi ve Tavake yedinden kefâletime binâen hükm-i hâkimü’ş-şer‘ ahz u kabz ettiklerinden sonra kefâlete[n] edâ eylediğim yüz altmış beş buçuk guruşu ile kendi malım olan yüz kırk iki buçuk guruşu ki min haysi’l-mecmû‘ üç yüz sekiz guruş vekîl-i mezbûr Serkis’den bundan akdem da‘vâ ve taleb eylediğimde, vekîl-i mezbûr Serkis dahi inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî beynimizde muslihûn tavassut edip vekîl-i mezbûr Serkis ile beynimizde yirmi aded guruş ile levni beynimizde ma‘lûm seksen aded Tokat bezi çintiyân üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yirmi kıt‘a esedî guruş ile sâlifü’z-zikr seksen aded çintiyân vekîl-i mezbûr Serkis’den bi’t-tamâm ve’l-kemâl ahz u kabz eylediğimden sonra ba‘de’l-yevm gāib-i mezbûr Avanos zimmetinde hakkım olan yüz kırk iki buçuk guruşa ve kefâlete[n] edâ eylediğim yüz kırk iki buçuk guruşa ve yirmi üç guruşa ve sâir hukūk-ı ma‘lûme ve mechûleye müte‘allika cemî‘ de‘âvî ve eymân-ı muhâsamâtdan gāib-i mezbûr Avanos’un zimmetini ibrâ-i âmm-ı kātı‘ü’l-hısâm ile ibrâ ve iskāt eyledim dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Durmuş Beşe b. Veli ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ ketb olundu. Fi’l-yevmi’s-sânî aşer min Saferi’l-muzaffer li sene seb‘a ve semânîn ve elf. Şuhûdü hâzihi’l-hücce aynı şuhûdi hücceti kabîli hâzihî.