.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 198
Hüküm no: 156
Orijinal metin no: [38b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kaptanıderya Ali Paşa kethüdâsı Ahmed Ağa’nın Mustafa Çelebi’ye saraç metaından kalan borcunu ödemesi gerektiği

Mahmiye-i İstanbul’da ( ) mahallesi sâkinlerinden olup sarrâc tâ’ifesinden olup bâ‘is-i hâze’l-kitâb Mustafa Çelebi b. Ahmed nâm dîvân-ı kāimmakām-ı hazret-i sadr-ı a‘zamîde akd olunan meclis-i şer‘de, bundan akdem kapudan iken vefât eden merhûm Kapudan Ali Paşa’nın kethüdâsı olan fahrü’l-akrân Ahmed Ağa b. Ali nâm kimesne mahzarında üzerlerine da‘vâ ve takrîr-i kelâm edip merhûm Ahmed Ağa bundan akdem yedimde iştirâ ve kabz eylediği beynimizde ma‘lûm sarrâc metâ‘ı bahâsından zimmetinde hakkım olan doksan beş guruş bir sülüsün yirmi guruşunu bana edâ ve teslîm ben dahi yedinden ahz u kabz edip yetmiş beş guruş bir sülüsü bâkī kalmış idi hâlâ merkūm Ahmed Ağa’ya suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl merkūm Ahmed Ağa cevâbında kaziyye minvâl-i muharrer üzre olup zikr olunan sarrâc metâ‘ı bahâsından meblağ-ı bâkī-i mezbûr yetmiş beş guruş bir sülüs zimmetinde müdde‘î-i mezbûra vâcibü’l-edâ ve lâzımü’l-kazâ deyni olduğunu ikrâr ve i‘tirâf etmeğin mûcebince meblağ-ı bâkī-i mezbûr yetmiş beş guruş bir sülüsü müdde‘î-i mezbûr Mustafa Çelebi’ye edâ ve teslîme mezbûr Ahmed Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Mefharü’l-erbâbü’t-tahrîr ve’l-kalem Hasan Efendi tezkire-yi ûlâ, kıdvetü ashâbü’t-tastîr ve’r-rakam Yusuf Efendi tezkire-yi sâniye, hâlâ çavuş-ı kāimmakām olan fahrü’l-akrân Murad Ağa, hâlâ Muhzır Ağa kāimmakāmı olan kıdvetü’l-emâsil ve’l-akrân Kasım Ağa, muhzırbaşı olan fahrü’l-ekfâ Mehmed Ağa b. Mehmed Efendi ve gayruhüm.