|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 198 Hüküm no: 157 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Diyarbakır muhtesibi Ahmed Ağa’nın Kadı Mutahhar Efendi’deki alacağının bir kısmını tahsil ve bir kısmını da tecil ettiği
Husûs-ı âti’l-beyânın mahallinde tahrîri için bi’l-iltimâs savb-ı şer‘-i şerîfden irsâl olunan Mevlânâ Abdurrahman Efendi b. Hüseyin, mahmiye-i İstanbul’da Kızıltaş mahallesinde fahrü’l-akrân Abdurrahman Ağa b. Osman’ın sâkin olduğu menzile varıp zeyl-i vesîkada mastûrü’l-esâmî müslimîn huzûrunda akd-i meclis-i şer‘-i mübîn eyledikde medîne-i Diyârbekir ahâlîsinden olup bin seksen beş senesi şehri Rebî‘ulevveli’nde muhtesib olan Ahmed Ağa b. Mehmed nâm kimesne meclis-i ma‘kūd-ı mezbûrda [39a] sene-i mezbûrda medîne-i merkūme kadısı olan umdetü’l-mevâli’l-izâm kıdvetü’l-e‘âli’l-kirâm sâhib-i hâze’l-kitâb Mutahharzâde demekle şehîr Mutahhar Efendi mahzarında ikrâr ve takrîr-i kelâm edip medîne-i mezbûrede esfâr için ehl-i hırefden cem‘ ve tahsîl etmek üzre kendi malımdan bin guruşu mûmâ-ileyh Mutahhar Efendi’ye def‘ ve teslîm ol dahi ahz u kabz edip ben dahi meblağ-ı mezbûru ehl-i hırefden cem‘ ve tahsîl edememekle, bundan akdem meblağ-ı mezbûr bin [guruş] ile medîne-i mezbûrda mûmâ-ileyh Mutahhar Efendi emretmekle üç ayda iştirâ ediverdiğim zahîreye masrûfum olan seksen yedi bin akçeyi mûmâ-ileyh Mutahhar Efendi’den taleb ve da‘vâ ettiğimde ol dahi cevâbında meblağ-ı mezbûr bin guruşu senden mukaddem muhtesib olan es-Seyyid Ömer ile beyninizde ba‘zı hesâbın olmağla mezbûr es-Seyyid Ömer’e teslîm etmiş idik deyip ve ber vech-i muharrer zahîreye seksen yedi bin akçe masrûfum olduğunu inkâr etmekle beynimizde nizâ‘-ı küllî vukū‘undan sonra muslihûn tavassut edip mûmâ-ileyh Mutahhar Efendi ile beynimizde iki yüz esedî guruş üzerine inşâ-i akd-i sulh ettiklerinden, ben dahi sulh-i mezbûru kabûl ve bedel-i sulh olan meblağ-ı mezbûr iki yüz esedî guruşun yetmiş esedî guruşunu nakid, otuz esedî guruşu için işbu müşâhed olan sîm gaddâreyi mûmâ-ileyh Mutahhar Efendi yedinden ahz u kabz edip bâkī yüz esedî guruşunu târih-i kitâbdan on ay tamâmına değin te’cîl ettiğimden sonra husûseyn-i mezbûreyne müte‘allika âmme-i de‘âvâdan mûmâ-ileyh Mutahhar Efendi’nin zimmetini ibrâ-i âmm-ı kātı‘ü’l-hısâm ile ibrâ ve iskāt eyledim dedikde gıbbe’t-tasdîki’ş-şer‘î ve’t-tahkīki’l-mer‘î husûs-ı mezbûru Mevlânâ-yı mezbûr mahallinde tahrîr, ba‘dehu irsâl olunan Mehmed b. Ahmed ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene seb‘a ve semânîn ve elf.
Şuhûdü’l-hâl: Fahrü’l-müderrisînü’l-kirâm Sefer Efendi b. Ali, Fahrü’l-akrân ve’l-iştibâh Abdurrahman Ağa b. Osman, Fahrü’l-eimmeti’l-kirâm Mehmed Efendi b. Abdünnebi, Abdülkādir Çelebi b. Ali, Mehmed Çelebi b. Ramazan, Ahmed Bey b. Mahmud, Mehmed Beşe b. Veli çukadâr-ı Molla Veli.
|