.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 199
Hüküm no: 158
Orijinal metin no: [39a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


el-Hâc Ahmed Efendi’nin Kasım b. Tahir’e, vasîsi olduğu Mustafa b. el-Hâc Mehmed’in yerine hacca gitmesi için para verdiği

Mahmiye-i İstanbul’da Sultan Süleyman Hân -aleyhi’r-rahmeti ve’l-gufrân-câmi‘-i şerîfi kurbunda Samanveren mahallesin[d]e sâkin bâ‘is-i hâze’l-kitâb el-Hâc Ahmed Efendi b. Abdülkerim nâm kimesne meclis-i şer‘-i şerîfde Medîne-i Münevvere’de Bâbü’r-rahme mahallesi ahâlîsinden olup umdetü’l-emâcid ve’l-ekârim ve câmi‘ü’l-mehâsin ve’l-mekârim zü’l-kadri’r-refî‘ ve’l-câhi’l-menî‘ izzetlü Hasan Ağa hazretlerinin mahalle-i mezbûrede vâki‘ sa‘âdethânelerine bi tarîki’l-müsâfere sâkin olan el-Hâc Kasım b. Tahir nâm kimesne mahzarında takrîr-i kelâm ve ta‘bîr ani’l-merâm edip mahalle-i mezbûrede sâkin iken bundan akdem vefât eden Mustafa b. el-Hâc Mehmed nâm kimesne hayâtında sülüs-i cemî‘ malımdan üç yüz elli esedî guruş ikrâz ve bir ehil ve müstakīm kimesneye verilip benim için hacc-ı? şerîf ettirile deyû vasiyyet ve tenfîzine beni vasiyy-i muhtâr nasb ve ihtiyâr edip musırran fevt olduğundan sonra müteveffâ-yı mezbûrun veresesi sülüs-i terekesinden meblağ-ı mezbûr üç yüz elli esedî guruşu ber vech-i muharrer ifrâz ve bana tamâmen def‘ ve teslîm ben dahi vesâyet-i mahkiyem hasebiyle ahz u kabz etmiş idim hâlâ ber vech-i muharrer makbûzum olan meblağ-ı mezbûr üç yüz elli guruşu müteveffâ-yı mezbûr için hacc-ı şerîf etmek mezbûr el-Hâc Kasım’a mûmâ-ileyh Hasan Ağa ma‘rifetiyle def‘ ve teslîm ol dahi ber vech-i muharrer yedimden ahz u kabz eylediğimden sonra işbu bin seksen yedi senesinde müteveffâ-yı mezbûr için hacc-ı şerîf etmek ta‘ahhüd eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene seb‘a ve semânîn ve elf.


Şuhûdü’l-hâl: El-Hâc Hüseyin b. Üveys, el-Hâc Mehmed b. Cum‘a, Mehmed Efendi b. Mehmed, Fahrü’l-müderrisînü’l-kirâm Mehmed Efendi, Hüseyin Bey b. Abdullah, Ali Efendi b. ( ), Ahmed Efendi, Fener? imâmı Ahmed Efendi, hazînedâr el-Hâc Ali Ağa ve gayruhüm mine’l-hâzırîn.