|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 200 Hüküm no: 159 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dunvak v. Mefruc’un, fırınında tezgâhtarlık yaptığı ekmekçi Avanos v. Arıcan’a olan borcunu vârislerine ödemesi gerektiği
Mahmiye-i İstanbul’da Cebeali Kapısı dâhilinde Molla Hüsrev mahallesinde vâki‘ ekmekçi fırınında ekmekçi iken hâlik olan Avanos v. Arıcan? nâm zimmînin [verâseti] zevcesi Hekina [nâ]m Nasrâniye ile li ebeveyn karındaşları Avakim ve Norsen ve Nehabet ve Aknargos nâm zimmîlere münhasıra olduğu şer‘an sâbit oldukdan sonra mezbûr Nehabet kendi tarafından asâleten ve mezbûrûn Hekina ve Avakim ve Norsen ve Aknargos taraflarından husûs-ı âti’l-beyâna vekîl olduğu nehc-i şer‘î ve tarîk-i mer‘î üzerine da‘vâ ve takrîr-i kelâm edip mezbûr Dunvak v. Mefruc? nâm zimmî mahzarında üzerine da‘vâ ve takrîr-i kelâm edip mezbûr Dunvak hâlik-i mezbûrun hayâtında zikr olunan fırında destgâhdârı olmağla bey‘ ediverdiği ekmek bahâsından elli esedî guruş ile beş yüz akçeyi kendi mesârifine sarfla istihlâk edip zimmetinde hâlik-i [39b] mezbûra deyni olup hattâ mûrisimiz mezbûr Avanos hâlik oldukdan sonra mezbûr Dunvak şuhûd mahzarında ikrâr dahietmiş idi hâlâ mezbûr Dunvak’a suâl olunup meblağayn-i mezbûreyni bana edâya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda zikr olunan Molla Hüsrev mahallesinde vâki‘ fırında ekmekçi olan Zarok v. Minas ve Kumkapı dâhilinde Nişâncı Paşa mahallesinde vâki‘ ekmekçi fırınında ekmekçi olan Bağdasar v. Kasbar nâm zimmîler li ecli’ş-şehâde meclis-i şer‘a hâzırân olup istişhâd olunduklarında elli guruş ile beş yüz akçeyi kendi mesârifine sarf ile istihlâk edip zimmetinde hâlik-i mezbûra deyni olduğunu bizim huzûrumuzda ikrâr ve bizi işhâdetmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘den irsâl olunan Mevlânâ Mehmed Efendi b. Nasûh evvelâ zikr olunan Molla Hüsrev mahallesine varıp ahâlîsinden Mustafa Beşe b. Yusuf ve Ramazan Çelebi b. Yusuf ve Ali Çelebi b. Mustafa ve es-Seyyid Çelebi b. Zülfikār ve Mustafa Çelebi b. İbrahim nâm kimesnelerden şâhid-i mezbûr Zarok’un keyfiyyet-i hâlini suâl edip ve sâniyen zikr olunan Nişâncı Paşa mahallesine varıp ahâlîsinden Mustafa b. Mahmud ve Hasan b. Mahmud ve Mehmed Çelebi b. Abdullah ve Mahmud Efendi b. Yusuf ve Ali Beşe b. Yusuf ve Hüseyin Çelebi b. Mehmed nâm kimesnelerden şâhid-i mezbûr Bağdasar’ın keyfiyyet-i hâlini suâl eyledikde her biri şâhidân-ı mezbûrânın lisânlarında ve ellerinde hatâsı yoktur, makbûlü’ş-şehâdedir deyû haber verdiklerini Mevlânâ-yı mezbûr mahallinde tahrîr ve ma‘an irsâl olunan Durmuş b. Mehmed ile meclis-i şer‘a gelip alâ vukū‘ihi inhâ ve takrîr etmeğin sırren ve alenen ta‘dîl ve tezkiyye olunduklarından sonra şehâdetleri makbûle olmağın mûcebince meblağayn-i mezbûreyn elli esedî guruş ile beş yüz akçeyi müdde‘î-i mezbûra edâ ve teslîme mezbûr Dunvak’a tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene seb‘a ve semânîn ve elf min hicreti men lehü’l-izzi ve’l-kemâlü’ş-şeref.
Şuhûdü’l-hâl: İbrahim Çelebi b. Mehmed, Ebûbekir b. Hüseyin, Veli b. Mahmud, Osman b. Ömer, Mehmed b. Abdullah ve gayruhüm.
|