|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 201 Hüküm no: 160 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaptanıderya Ali Paşa’nın Eyyûb Efendi’ye olan borcunun tereke malından ödenmesi
Mahmiye-i İstanbul’da ( ) mahallesi sâkinelerinden umdetü’l-emâcid ve’l-ekârim sâhib-i hâze’l-kitâb Eyyûb Efendi b. ( ) dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. el-merhûm Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîr[e] kızları Aliye Hanım’a ve Hümâ Hanım’a ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun etbâ‘ından Abdülbâkī Ağa b. Ahmed ve kethüdâsı Ahmed Ağa b. Ali nâm kimesneler şehâdetleri ile şer‘an sâbit olan Ömer Efendi b. Hüseyin nâm kimesne ile kezâlik müteveffâ-yı mezbûrun terekesine vâzı‘ü’l-yed olan mûmâ-ileyh Mehmed Bey mahzarlarında üzerlerine da‘vâ ve takrîr-i kelâm edip müteveffâ-yı mezbûr Ali Paşa’nın zimmetinde hayâtında emri ile sûr-ı hümâyûn peşkeşi için iştirâ ediverdiğim seksen altı senesi îd-i şerîfi peşkeşi için iştirâ ediverdiğim emti‘a-i mütenevvi‘a bahâlarından bâkī on sekiz yük otuz altı bin akçe hakkım olup hattâ şuhûd mahzarında ikrâr ve yedine hat ve hatmini hâvî iki kıt‘a teme[ssü]k dahi verdiğinden sonra ciheteyn-i mezkûreteynden hakkım olan meblağayn-ı mezbûreyn, cem‘an yirmi dört yük yetmiş dört bin dört yüz akçeyi kable’l-edâ merhûm Ali Paşa vefât edip zimmetinde kalmağla merkūmân Mehmed Bey ve Ömer Efendi’ye suâl olunup müteveffâ-yı merkūmun tereke-i vâfiyesinden bana edâ ve teslîme tenbîh olunmak matlûbumdur dedikde gıbbe’s-suâl merkūmân Mehmed Bey ve Ömer Efendi cevâblarında [40a] kaziyye minvâl-i muharrer üzre olup müdde‘î-i mûmâ-ileyh Eyyûb Efendi’nin ciheteyn-i mezkûreteynden meblağayn-i mezbûreyn cem‘an yirmi dört yük yetmiş dört bin dört yüz akçe müteveffâ-yı mezbûr Ali Paşa zimmetinde hakkı olduğunu müteveffâ-yı mezbûrun muhallefâtından ba‘de’l-ihrâci’d-düyûni’l-müsbete meblağ-ı mezbûr kendiler kabz eyledikleri asâleten ve vekâleten her biri ikrâr ve i‘tirâf etmeğin alâ mûceb-i i‘tirâfihimâ müteveffâ-yı mezbûr Ali Paşa’nın terekesinden meblağ-ı mezbûr yirmi dört yük yetmiş dört bin dört yüz akçeyi müdde‘î-i mûmâ-ileyh Eyyûb Efendi’ye edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene seb‘a ve semânîn ve elf.
Şuhûdü’l-hâl: Hasan Efendi tezkire-i ûlâ, Yusuf Efendi tezkire-i sâniye, Fahrü’l-akrân Kemaleddin Kethüdâ-yı Hazret-i Efendi.
|