.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 202
Hüküm no: 161
Orijinal metin no: [40a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Fâtıma bt. Sefer’in mirası konusunda mirasçıların anlaştıkları

Mahmiye-i İstanbul’da Hoşkadem mahallesinde sâkine iken bundan akdem vefât eden Fâtıma bt. Sefer nâm hâtunun verâseti li ebeveyn er karındaşı kızının oğlu fahrü’l-eimmeti’l-kirâm Mehmed Efendi b. Hüseyin nâm kimesne ile mezbûr Mehmed Efendi’nin li ebeveyn kız karındaşı zahrü’l-muhadderât Sâliha nâm hâtuna münhasıra olduğu şer‘an mütehakkik oldukdan sonra mezbûr Mehmed Efendi asâleten ve mezbûre Sâliha Hâtun’un zevci ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mezbûr Mehmed Efendi ve Mustafa Efendi b. Şaban ve İsmail Beşe b. Abdullah nâm kimesneler şehâdetleri ile şer‘an sâbit olan diğer Mehmed Efendi b. İslâm nâm kimesne vekâleten meclis-i şer‘-i şerîfde mahalle-i mezbûre sâkinelerinden bâ‘isetü hâze’l-vesîka diğer Fâtıma bt. el-Hâc Mustafa nâm hâtunun zevci ve tarafından husûs-ı câ’i’z-zikre vekîl olduğu kezâlik zâtını ma‘rifet-i şer‘iyye ile ârifân mezbûrân Mustafa Efendi ve İsmail Beşe şehâdetleriyle şer‘an sâbit olan Ahmed Çelebi b. Abdullah nâm kimesne mahzarında her biri ikrâr ve takrîr-i kelâm edip müvekkile-i mezbûre diğer Fâtıma müteveffât-ı mezbûrenin li ebeveyn hâletin? kızı olmağla vârisesi olmak zu‘muyla tereke-i müteveffât-ı mezbûreden ber mûceb-i defter-i kassâm yüz yirmi esedî guruşuna vâzı‘atü’l-yed olmağın meblağ-ı mezbûr yüz yirmi esedî guruşu mezbûre diğer Fâtıma’dan asâleten ve vekâleten da‘vâ ve taleb eylediğimizde, ol dahi edâdan imtinâ‘ etmeğin beynimizde nizâ‘-ı küllî vukū‘undan sonra muslihûn tavassut edip mezbûre Fâtıma ile altmış esedî guruş üzerine beynimizde inşâ-i akd-i sulh eylediklerinde biz dahi asâleten ve vekâleten sulh-ı mezbûru kabûl ve bedel-i sulh olan meblağ-ı mezbûr altmış esedî guruşu mezbûre diğer Fâtıma yedinden ahz u kabz eylediğimizden sonra tereke-i müteveffât-ı mezbûreye müte‘allika âmme-i de‘âvî ve mütâlebâtdan asâleten ve vekâleten müvekkile-i mezbûre Fâtıma’nın zimmetini ibrâ-i âm ile ibrâ ve iskāt eyledi dediklerinde vekîl-i mezbûr Ahmed Çelebi dahi bi’l-vekâle takrîr-i kelâm edip zevcem mezbûre diğer Fâtıma Hâtun dahi kezâlik husûs-ı mezkûre müte‘allika cemî‘ de‘âvî ve muhâsamâtdan merkūm Mehmed Efendi ile müvekkile-i mezbûre Sâliha Hâtun’un zimmetlerini ibrâ ve iskāt eyledi dedikde gıbbe’t-tesâdiki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene seb‘a ve semânîn ve elf.


Şuhûdü’l-hâl: Mefharü’l-eimmeti’l-kirâm Şaban Efendi, Zahrü’l-eimmeti’l-fihâm Mustafa Efendi, Mehmed Efendi b. Ahmed, İsmail Beşe b. ( ) ve gayruhüm.