.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 203
Hüküm no: 162
Orijinal metin no: [40a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fırıncı Marat v. Zarin’in, ortağı Bağdasar’ın Tanaş Reis v. Papas’a olan borcunu ödemesi gerektiği

Mahmiye-i İstanbul’da Kiremitçi mahallesi ahâlîsinden Tanaş Reis v. Papas nâm zimmî meclis-i şer‘-i şerîfde ekmekçi tâ’ifesinden olup mahmiye-i merkūmede Kırkçeşme kurbunda vâki‘ fırında ekmekçi olan Marat v. Zarin nâm zimmî mahzarında üzerine da‘vâ ve takrîr-i kelâm edip mezbûr Marat’ın şerîki Bağdasar nâm zimmî zimmetinde bundan akdem yedimden iştirâ ve kabz eylediği beynimizde ma‘lûm buğday bahâsından on bin akçe hakkım olmağla mezbûr Bağdasar meblağ-ı mezbûr için beni merkūm Marat üzerine cümlemiz bir meclisde iken tarafeynden emir ve kabûlü hâviye havâle-i sahîha-i şer‘iyye ile havâle etmeğin hâlâ mezbûr Marat’a suâl olunup cihet-i havâle-i mezkûreden bana deyni olan meblağ-ı mezbûr on bin akçenin alıverilmesi matlûbumdur dedikde gıbbe’s-suâl merkūm Marat cevâbında fi’l-hakīka mezbûr Bağdasar ber vech-i muharrer deyni olan meblağ-ı mezbûr için dâyini müdde‘î-i mezbûr Tanaş’ı üçümüz bir yerde iken üzerime emir ve kabûlü hâviye havâle-i sahîha-i şer‘iyye ile havâle etmekle hâlâ cihet-i havâle-i mezbûreden müdde‘î-i mezbûr Tanaş’a on bin akçe zimmetimde vâcibü’l-edâ deynimdir deyû tav‘an ikrâr ve i‘tirâf etmeğin mûcebiyle cihet-i havâle-i mersûmeden müdde‘î-i mezbûra deyni olan meblağ-ı mezbûr on bin akçeyi müdde‘î-i mezbûr Tanaş’a edâ ve teslîme merkūm Marat’a tenbîh olunmağın mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene seb‘a ve semânîn ve elf.


Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Abdurrahman Efendi b. Hüseyin, Hasan Beşe el-Mübâşir, Mehmed b. Ahmed.