|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 204 Hüküm no: 163 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaptanıderya Ali Paşa kethüdâsı Ahmed Ağa’nın Ali Paşa’nın kızının çeyizi için aldığı yapağı bahasından Abdullah b. Ebûbekir’e olan borcunu ödemesi gerektiği
Mahrûse-i Galata müzâfâtından kasaba-i Tophâne’de Ağa Hamamı mahallesi sâkinlerinden râfi‘-i hâze’l-kitâb Abdullah b. Ebûbekir nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde merhûm Kapudan Ali Paşa’nın kethüdâsı olan fahrü’l-akrân Ahmed Ağa b. Ali nâm kimesne mahzarında üzerine da‘vâ ve takrîr-i kelâm edip merkūm Ahmed Ağa merhûm-ı mezbûrun kerîmelerine cihâz için yedimden iştirâ ve kabz eylediği yapağı bahâsından zimmetinde hakkım olan yüz yirmi beş guruşun altmış guruşu bana edâ ve teslîm ben dahi yedinden ahz u kabz edip altmış beş guruşu bâkī kalmağla hâlâ merkūm Ahmed Ağa’ya suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl merkūm Ahmed Ağa cevâbında kaziyye minvâl-i muharrer üzre olup zikr olunan yapağı bahâsından meblağ-ı bâkī-i mezbûr altmış beş guruş zimmetinde müdde‘î-i mezbûra vâcibü’l-edâ ve lâzımü’l-kazâ deyni olduğunu ikrâr ve i‘tirâf etmeğin mûcebince meblağ-ı bâkī-i mezbûr altmış beş guruşu müdde‘î-i mezbûra edâ ve teslîme merkūm Ahmed Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.
Şuhûdü’l-hâl: Hasan Efendi tezkire-i ûlâ, Yusuf Efendi tezkire-i sâniye, Murad Ağa çavuşbaşı, Kasım Ağa muhzır, muhzırbaşı Mehmed Ağa b. Ali Efendi, Kemaleddin Ağa Kethüdâ-yı Hazret-i Efendi.
|