.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 205
Hüküm no: 164
Orijinal metin no: [40b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kaptanıderya Ali Paşa’nın kethüdâsı Ahmed Ağa’nın Ali Paşa’nın kızının çeyizi için aldığı eşyadan Yako v. İlya’ya olan borcunu ödemesi gerektiği

Mahmiye-i İstanbul’da Balatkapısı hâricinde Karabaş mahallesi sâkinlerinden bâ‘is-i hâze’l-kitâb Yako v. İlya nâm yahudi dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa’nın kethüdâsı olan fahrü’l-akrân Ahmed Ağa b. Ali Paşa’nın kethüdâsı olan fahrü’l-akrân Ahmed Ağa b. Ali nâm kimesnenin mahzarında üzerine da‘vâ ve takrîr-i kelâm edip merkūm Ahmed Ağa bundan akdem merhûm-ı mezbûrun kerîmesine cihâz için yedimden iştirâ ve kabz eylediği beynimizde ma‘lûm eşyâ bahâsından hakkım olan bin dört yüz elli iki buçuk guruşun bin yüz otuz yedi buçuk guruşunu bana edâ ve teslîm ben dahi yedinden ahz u kabz edip üç yüz on beş guruşu bâkī kalmış idi hâlâ merkūm Ahmed Ağa’ya suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl merkūm Ahmed Ağa cevâbında kaziyye minvâl-i muharrer üzre olup zikr olunan eşyâ bahâsından meblağ-ı bâkī-i mezbûr üç yüz on beş guruş zimmetinde müdde‘î-i mezbûra vâcibü’l-edâ ve lâzımü’l-kazâ deyni olduğunu ikrâr ve i‘tirâf etmeğin mûcebince meblağ-ı bâkī-i mezbûr üç yüz on beş guruşu müdde‘î-i mezbûr Yako’ya edâ ve teslîme mezbûr Ahmed Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Çavuş Murad Ağa, Hasan Efendi tezkire-i ûlâ, Yusuf Efendi tezkire-i sânî, muhzır Kasım Ağa, muhzırbaşı Mehmed Ağa b. Ali Efendi, fahrü’l-akrân Kemaleddin Ağa Kethüdâ-yı Hazret-i Efendi.