.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 205
Hüküm no: 165
Orijinal metin no: [40b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kaptanıderya Ali Paşa hazinedârı Ahmed Ağa’nın aldığı eşyalar dolayısıyla Yako v. İlya’ya olan borcunu ödemesi gerektiği

Mahmiye-i İstanbul’da Balatkapısı hâricinde Karabaş mahallesi sâkinlerinden bâ‘is-i hâze’r-rakīm Yako v. İlya nâm yahudi meclis-i şer‘-i şerîfde bundan akdem kapudan iken vefât eden merhûm Ali Paşa’nın hazînedârı olan Ahmed Ağa b. Abdullah nâm kimesne mahzarında üzerine da‘vâ ve takrîr-i kelâm edip merkūm Ahmed Ağa zimmetinde bundan akdem yedimden iştirâ ve kabz eylediği beynimizde ma‘lûm yorgan [ve] döşek ve kutnî ve kâğıd bahâlarından yüz otuz guruş hakkım olmağla hâlâ merkūm Ahmed Ağa’ya suâl olunup meblağ-ı mezbûrun alıverilmesi matlûbumdur dedikde gıbbe’s-suâl merkūm Ahmed Ağa cevâbında kaziyye minvâl-i muharrer üzre olup zikr olunan yorgan ve döşek ve kutnî ve kâğıd bahâlarından zimmetinde müdde‘î-i mezbûr Yako’ya yüz otuz guruş vâcibü’l-edâ ve lâzımü’l-kazâ deyni olduğunu ikrâr ve i‘tirâf etmeğin mûcebince meblağ-ı mezbûr yüz otuz guruşu müdde‘î-i mezbûr Yako’ya edâ ve teslîme merkūm Ahmed Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin aşer min Saferi’l-hayr li sene seb‘a [ve semânîn] ve elf.


Şuhûdü’l-hâl: İbrahim Çelebi b. Mehmed, Mehmed Çelebi b. Abdullah, el-Hâc Mehmed b. Ali, el-Hâc Mehmed b. Receb, Ahmed Ağa b. ( ) ve gayruhüm.