.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 206
Hüküm no: 166
Orijinal metin no: [41a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Mehmed’in vârislerinden olan kardeşi Mehmed’in miras hissesini vasî Abdülaziz Efendi’den alarak zimmetini ibrâ ettiği

Mahmiye-i İstanbul’da Emin Sinan mahallesinde sâkine iken bundan akdem vefât eden Fâtıma bt. Mehmed nâm sagīrenin verâseti vâlidesi Gülbûy bt. Abdullah nâm hâtun ile li üm karındaşı Yusuf’a ve li eb karındaşları Mehmed ve Ahmed ve Ayşe’ye münhasıra olup kable’l-kısme mezbûr Yusuf nâm kimesne ile vâlidesi mezbûre Gülbûy’a münhasıra tashîh-i mes’eleleri bi hükmi’l-münâsahati’ş-şer‘iyye otuz altı sehim i‘tibâr olunup sihâm-ı mezbûrdan sekiz sehmi mezbûr Gülbûy’a ve dokuz sehmi mezbûrân Mehmed ve Ahmed’den her birine ve altı sehmi mezbûre Ayşe’ye ve dört sehmi mezbûr Yusuf’a isâbet eylediği şer‘an sâbit ve mütehakkik oldukdan sonra mezbûr Mehmed meclis-i şer‘-i şerîfde sagīre-i mezbûre Fâtıma’nın tesviye-i umûruna savb-ı şer‘den mansûb vasîsi olmağla müteveffât-ı mezbûre Fâtıma terekesine vâzı‘ü’l-yed olan sâhib-i hâze’l-kitâb es-Seyyid Abdülaziz Efendi b. es-Seyyid Mehmed mahzarında ikrâr ve takrîr-i kelâm edip mezbûre Fâtıma’nın kalîl u kesîr ve celîl u hakīr cemî‘ terekesinden bi tarîki’l-münâsahati’ş-şer‘iyye bana isâbet eden otuz üç esedî guruş ile bir sülüs hisse-i şer‘iyyemi mezbûr es-Seyyid Abdülaziz yedinden bi’t-tamâm ahz u kabz ettiğimden sonra müteveffât-ı mezbûrenin terekesine müte‘allika âmme-i de‘âvî ve eymân ve muhâsamâtdan biz mezbûr Abdülaziz Efendi’nin zimmetini ibrâ-i âmm-ı kātı‘ü’l-hısâ[m] ile ibrâ ve iskāt edip ba‘de’l-yevm benden bi’z-zât yâ vekîlimden bi’l-vekâle tereke-i müteveffât-ı mezbûreye müte‘allika da‘vâ ve nizâ‘ sudûr ederse lede’l-hükkâmi’l-kirâm mesmû‘a olmasın dedikde mezbûr Abdülaziz Efendi mukırr-ı mezbûru cemî‘ kelimâtında şifâhen tasdîk ve vicâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sâmin aşer min Saferi’l-hayr li sene seb‘a ve semânîn ve elf ba‘de hicreti men lehü’l-izzi ve’ş-şeref.


Şuhûdü’l-hâl: Mustafa Efendi b. Cafer el-Müezzin, Fazlullah Çelebi b. Mehmed el-Müezzin, Receb Bey b. Abdullah Bevvâbü’s-sultânî, Mehmed b. İsâ, Mustafa b. Şaban, Molla Abdullah b. Yusuf, Mehmed b. Nasûh ve gayruhüm mine’l-hâzırîn.