|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 207 Hüküm no: 167 Orijinal metin no: [41a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaptanıderya Ali Paşa’nın terekesinden Kürkçü Hırsanno v. Yanaki’nin alacağının ödenmesi
Mahmiye-i İstanbul’da Mahmud Paşa kurbunda sâkin olup kürkçü tâ’ifesinden olan bâ‘is-i hâze’r-rakīm Hırsanno v. Yanaki nâm zimmî dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevc[e]-i metrûkesi fahrü’l-muhadderât Rukiye Hanım b. el-merhûm Mahmud Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey ve sulbî[ye] kebîr[e] kızları Aliye Hanım ve Hümâ Hanım’a ve sulbî[ye] sagīr[e] kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun terekesine vâzı‘[atü]’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyân[a] vekîlleri olduğu zâtlarını ma‘rifet-i şer‘î ile ârifân müteveffâ-yı mezbûrun kethüdâsı Ahmed Ağa b. Ali ve etbâ‘ından Abdülbâkī Ağa b. Ahmed nâm kimesnelerin şehâdetleri ile şer‘an sâbit olan Ömer Efendi b. Hasan nâm kimesne ile kezâlik müteveffâ-yı mezbûrun tereke-i vâfiyesine vâzı‘ü’l-yed olan mûmâ-ileyh Mehmed Bey mahzarlarında üzerlerine da‘vâ ve takrîr-i kelâm edip müteveffâ-yı mezbûr Ali Paşa zimmetinde hayâtında yedimden iştirâ ve kabz eylediği mâ beynimizde ma‘lûm sırt samur kürk ve samur paçası kürk bahâlarından sekiz yüz altmış dört guruş hakkım olup hattâ şuhûd mahzarlarında ikrâr dahi eyledikden sonra meblağ-ı mezbûrun beş yüz guruşu bana teslîm ben dahi ahz u kabz edip üç yüz altmış dört guruşu bâkī kaldıkdan sonra meblağ-ı bâkī-i mezbûru kable’l?-edâ merkūm Ali Paşa vefât edip zimmetinde kalmağla hâlâ merkūmân Mehmed Bey ve Ömer Efendi’ye suâl olunup meblağ-ı bâkī-i mezbûr üç yüz altmış dört guruşu müteveffâ-yı mezbûrun tereke-i vâfiyesinden bana edâya ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına mutâbık beyyine taleb olundukda [41b] müteveffâ-yı mezbûrun kethüdâsı olan merkūm Ahmed Ağa hazînedârı olan diğer Ahmed Ağa b. Abdullah nâm kimesneler ile min ecli’ş-şehâde meclis-i şer‘a hâzırân olup istişhâd olunduklarından, fi’l-hakīka müteveffâ-yı mezbûr Ali Paşa hayâtında zikr olunan sırt samur kürk ve samur paçası kürk bahâlarından zimmetinde müdde‘î-i mezbûra vâcibü’l-edâ ve lâzımü’l-kazâ sekiz yüz altmış dört guruş zimmetinde deyni olduğunu bizim huzûrumuzda ikrâr ve bizi işhâdetmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘î ettiklerinde ba‘de’t-ta‘dîl ve tezkiyye şehâdetleri makbûle olup müdde‘î-i mezbûra tahlîf-i şer‘î ile tahlîf olundukdan sonra mûcebince meblağ-ı bâkī-i mezbûr üç yüz altmış dört guruşu müteveffâ-yı mezbûr Ali Paşa’nın tereke-i vâfiyesinden müdde‘î-i mezbûr Hırsanno’ya edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.
Şuhûdü’l-hâl: Hasan Efendi tezkire-i ûlâ, Yusuf Efendi tezkire-i sâniye, çavuşbaşı Murad Ağa, Fahrü’l-a‘yân ve’l-eşbâh Kemaleddin Kethüdâ-yı Hazret-i Efendi.
|