.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 208
Hüküm no: 168
Orijinal metin no: [41b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa Beşe b. Ömer’in, kardeşi Mehmed Beşe’ye devrettiği ve onun tarafından da Mehmed Bey b. Muharrem’e satılan harman yeri ve arsaları geri alamayacağı

Vilâyet-i Anadolu’da Küre-i Nühâs kazâsına tâbi‘ Koçaklı nâm karye ahâlîsinden olup mahmiye-i İstanbul’da Üsküblü mahallesinde tavattun eden Mustafa Beşe b. Ömer nâm kimesne meclis-i şer‘-i şerîfde karye-i mezbûrda vâki‘ zikr-i âtî akāra vâzı‘ü’l-yed olduğu mütehakkik olan sâhib-i hâze’l-kitâb Mehmed Bey b. Muharrem nâm kimesne mahzarında üzerine da‘vâ ve takrîr-i kelâm edip bundan akdem yedimde mülküm ve hakkım olup karye-i mezbûrede vâkı‘a lede’l-ahâlî ve’l-cîrân her biri ma‘lûmü’l-hudûd mülk harman yerini ve samanhâne arsasını li üm karındaşım işbu hâzır bi’l-meclis Mehmed Beşe nâm kimesneye âhara bey‘ etmemek şartıyla kırk guruşa bey‘ ve teslîm ve ma‘lûmü’l-hudûd tarlalarımı kırk guruş bedel-i makbûz mukābelesinde ferâğ ve tefvîz ol dahi iştirâ ve tesellüm ve tefevvüz ve kabûl ettikden sonra ve emlâk-i mezbûreyi mezbûr Mehmed Bey’e bey‘ ve tarlaları dahi ma‘rifet-i sâhib-i arz ile ferâğ ve tefvîz etmeğin hâlâ şart-ı mezkûra binâen mezbûr Mehmed Bey emlâk-i mezbûreye ve arâzi-i merkūmeye bi gayr-ı vech vaz‘-ı yed etmekle hâlâ mezbûr Mehmed Bey’e suâl olunup zikr olunan harman yeri ve samanhâne arsası ve menzil arsasından kasr-ı yed edip mahallelerinde zabta beni taslît etmek üzre tenbîh olunmak matlûbumdur dedikde müdde‘î-i mezbûrun ber vech-i muharrer da‘vâsı meşrû‘ olmayıp, mezbûr Mehmed Bey’e şer‘an suâl dahi tevcîh etmemekle müdde‘î-i mezbûr ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Receb Çelebi b. Mehmed, Mustafa Çelebi b. Abdi, Mustafa Çelebi b. Abdullah, Hasan Çelebi b. Şaban, Hasan Beşe b. Mehmed, Mustafa b. Osman, Mehmed b. Himmet, el-Hâc Ali b. Musa, Mehmed b. Ramazan, el-Hâc Mahmud b. Mahmud, Hasan b. Halil ve gayruhüm.