.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 209
Hüküm no: 169
Orijinal metin no: [41b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ümmühâni bt. Mutahhar Efendi’nin Ahmed Bey b. İsmail’den satın aldığı câriyenin ayıplı olmasından dolayı iade ederek parasını geri alması

Mahmiye-i İstanbul’da el-Hâc Ferhad mahallesinde sâkine bâ‘isetü hâze’l-kitâb tâcü’l-muhadderât Ümmühâni bt. el-mevlâ el-merhûm Mutahhar Efendi tarafından husûs-ı âti’l-beyâna vekîl olduğu nehc-i şer‘î üzre sâbit olan Mehmed Efendi b. Abdülvâhid Efendi meclis-i şer‘-i şerîfde mahmiye-i mezbûrede Davud Paşa mahallesinde sâkin Ahmed Bey b. İsmail nâm kimesne mahzarında bi’l-vekâle üzerine da‘vâ ve takrîr-i kelâm edip mezbûr Ahmed müvekkilem mezbûre Ümmühâni Hâtun’a târih-i kitâbdan otuz yedi gün mukaddem işbu açık kara kaşlı sarı ala gözlü orta boylu Rûsiyyetü’l-asl Mariya ta‘bîr olunur câriyesini her ayıbdan sâlime olmak üzre doksan dört guruş semen-i makbûza bey‘ ve teslîm ol dahi iştirâ ve kabûl ve kabz etmiş idi hâlâ müvekkilem mezbûre Ümmühâni mevsûfe-i mezbûre veca‘-ı verek marazına mübtelâ ve mu‘ayyebe olduğuna muttali‘ olup ayb-ı mezbûr bâyi‘-i merkūm yanında kable’l-bey‘ mevcûd ve kadîm [42a] olmağla hâlâ mezbûr Ahmed Bey’e suâl olunup mevsûfe-i mezbûreyi kabza ve semen-i mezbûr doksan dört guruşu bana edâ ve teslîme tenbîh olunmak matlûbumdur dedikde ayb-ı mezbûru etıbbâya mürâca‘at ile ma‘lûm olan uyûbdan olmağla teveccüh-i husûmet için mevsûfe-i mezbûre etıbbâdan olup taraf-ı şehriyârîden ehl-i hibre ta‘yîn olunan Mehmed Efendi b. Mustafa ve Abdullah Efendi b. Mustafa nâm kimesnelere irâet olundukda anlar dahi mevsûfe-i mezbûre ayb-ı mezbûr ile elân mu‘ayyebe olduğunu haber vermeleri ile mezbûr Ahmed Bey’e suâl olundukda mezbûr Ahmed Bey cevâbında târih-i kitâbdan otuz yedi gün mukaddem mevsûfe-i mezbûreyi müvekkil-i merkūmeye doksan dört guruşa bey‘ ve teslîm ve kabz-ı semen ettiğini ikrâr, lâkin ayb-ı mezbûrun kable’l-bey‘ mevcûd ve kadîm olduğunu inkâr etmeğin müdde‘î-i mezbûrdan ayb-ı mezbûrun kıdemine beyyine taleb olundukda mezbûrân Mustafa Efendi ve Abdullah Efendi li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mevsûfe-i mezbûrenin ayb-ı mezbûru iki aydan ekalde hâdis ola değildir kadîmdir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müvekkile-i mezbûre muhadderâtdan olmağla meclis-i şer‘a huzûr müte‘azzir olmağın tahlîf için savb-ı şer‘den irsâl olan Mevlânâ es-Seyyid Abdülmu‘tî Efendi mezbûre Ümmühâni Hâtun’un zikr olunan el-Hâc Ferhad mahallesinde sâkine olduğu menzile varıp zeyl-i vesîkada muharrerü’l-esâmî ile akd olunan meclis-i şer‘-i mübîn edip mezbûre Ümmühâni Hâtun’a zâtı ma‘rifet-i şer‘iyye ile ârifân Mehmed Çelebi b. Muslu ve Kadri Çelebi b. Ali ta‘rîfleri ile mu‘arrefe oldukdan sonra mevsûfe-i mezbûrenin ayb-ı mezbûruna muttali‘a oldukdan sonra mevsûfe-i mezbûreyi istihdâm ve bey‘a arz etmeyip, kendiden kabûlü müş‘ire bir fi‘l sâdır olmadığına mezbûr Ahmed Bey muvâcehesinde yemîn teklîf ettiğinde, ol dahi alâ vefki’l-mes’ûl yemîn billâhi’l-aliyyi’l-a‘lâ ettiğini Mevlânâ-yı mezbûr mahallinde tahrîr ve ma‘an irsâl olunan Mehmed b. Abdullah ile meclis-i şer‘a gelip alâ vukū‘ihi inhâ ve takrîr etmeğin mûcebince mevsûfe-i mezbûreyi kabza ve meblağ-ı mezbûr doksan dört esedî guruşu müdde‘î-i mezbûra edâ ve teslîme merkūm Ahmed Bey’e tenbîh olunmağın mâ vaka‘a bi’t-taleb ketb olundu. Fî müntasıfı Saferi’l-hayr li sene seb‘a ve semânîn ve elf.


Şuhûdü’l-hâl: Mehmed Çelebi b. Muslu, Kadri Çelebi b. Ali, el-Hâc Kasım çukadâr ve gayruhüm.