.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 210
Hüküm no: 170
Orijinal metin no: [42a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Merhum Kaptanıderya Ali Paşa’nın terekesinden Yako v. İlya’nın alacağının ödenmesi

Mahmiye-i İstanbul’da Balatkapısı hâricinde Karabaş mahallesi sâkinlerinden râfi‘-i hâze’r-rakīm Yako v. İlya nâm yahudi dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. el-merhûm Mehmed Paşa ve sulbî sagīr oğlu Ebûbekir Bey’e ve sulbiye kebîre kızları Aliye Hanım ve Hümâ Hanım’a ve sulbiye sagīr[e] kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîl olduğu zâtlarını [42b] ma‘rifet-i şer‘iyye ile ârifân müteveffâ-yı mezbûrun kethüdâsı Ahmed Ağa b. Ali ve etbâ‘ından Abdülbâkī Ağa b. Ahmed nâm kimesneler şehâdetleri ile şer‘an sâbit olan Ömer Efendi b. Hüseyin nâm kimesne ile kezâlik müteveffâ-yı mezbûrun tereke-i vâfiyesine vâzı‘ü’l-yed olan mûmâ-ileyh Mehmed Bey mahzarlarında üzerine da‘vâ ve takrîr-i kelâm edip müteveffâ-yı mezbûr Ali Paşa zimmetinde hayâtında yedimde iştirâ ve kabz eylediği beynimizde ma‘lûm tülbent ve hil‘at ve çuka bahâlarından yedi yüz on esedî guruş hakkım olup hattâ merkūm Ali Paşa hayâtında şuhûd mahzarında ikrâr dahi ettiğinden sonra meblağ-ı mezbûr kable’l-edâ vefât edip zimmetinde kalmağla hâlâ merkūmân Mehmed Bey ve Ömer Efendi’ye suâl olunup meblağ-ı mezbûr yedi yüz on guruşu müteveffâ-yı mezbûrun tereke-i vâfiyesinden bana edâ ve teslîme tenbîh olunmak matlûbumdur dedi[kde] gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa ile hazînedârı olan diğer Ahmed Ağa b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Paşa hayâtında zikr olunan tülbent ve hil‘at ve çuka bahâlarından zimmetinde müdde‘î-i mezbûra vâcibü’l-edâ ve lâzımü’l-kazâ yedi yüz on guruş deyni olduğu[nu] bizim huzûrumuzda ikrâr ve bizi işhâd etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince meblağ-ı mezbûr yedi yüz on guruşu müteveffâ-yı mezbûrun tereke-i vâfiyesinden müdde‘î-i mezbûr Yako’ya edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Hasan Efendi tezkire-i ûlâ, Yusuf Efendi tezkire-i sâniye, çavuşbaşı Murad Ağa, Fahrü’l-eşbâh el-Hâc Kemaleddin Kethüdâ-yı Hazret-i Efendi, Muhzır Kasım Ağa ve gayruhüm.