.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 211
Hüküm no: 171
Orijinal metin no: [42b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kaptanıderya Ali Paşa’nın terekesinden Solak Ramazan Çelebi b. Hasan’ın alacağının ödenmesi

Hâlâ Saraçhâne kethüdâsı olan bâ‘is-i hâze’l-kitâb Solak Ramazan Çelebi b. Hasan dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. el-merhûm Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîr[e] kızları Aliye Hanım ve Hümâ Hanım ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun etbâ‘ından Abdülbâkī Ağa b. Ahmed ve kethüdâsı Ahmed Ağa b. Ali nâm kimesneler şehâdetleri ile şer‘an sâbit olan Ömer Efendi b. Hüseyin nâm kimesne ile kezâlik müteveffâ-yı mezbûrun terekesine vâzı‘ü’l-yed olan mûmâ-ileyh Mehmed Bey mahzarlarında üzerine da‘vâ ve takrîr-i kelâm edip müteveffâ-yı mezbûr Ali Paşa zimmetinde hayâtında yedimde iştirâ ve kabz eylediği beynimizde ma‘lûm sarrâc metâ‘ı semeninden yüz yirmi üç guruş hakkım olup hattâ şuhûd mahzarında ikrâr dahi ettikden sonra meblağ-ı mezbûrun seksen guruşunu ahz u kabz edip kırk üç guruşunu zimmetinde bâkī kaldığından sonra meblağ-ı bâkī-i mezbûru kable’l-edâ merkūm Ali Paşa vefât edip zimmetinde kalmağla hâlâ merkūmân Mehmed Bey ve Ömer Efendi’ye suâl olunup meblağ-ı bâkī-i mezbûru müteveffâ-yı mezbûrun tereke-i vâfiyesinden bana edâya tenbîh olunmak matlûbumdur dedikde gıbbe’s-suâl ve’l-inkâr [43a] müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa ve hazînedârı olan Ahmed Ağa b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr yedinden iştirâ ve kabz ettiği beynlerinde ma‘lûme sarrâc metâ‘ı semeninden zimmetinde müdde‘î-i mezbûra yüz yirmi üç guruş vâcibü’l-edâ ve lâzımü’l-kazâ deyni olduğunu bizim huzûrumuzda ikrâr ve bizi işhâd etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr Ramazan Çelebi tahlîf-i şer‘î ile tahlîf olundukdan sonra mûcebince meblağ-ı mezbûr kırk üç guruşu müteveffâ-yı mezbûrun tereke-i vâfiyesinden müdde‘î-i mezbûr Ramazan Çelebi’ye edâ ve teslîme mezbûrân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb ve terkīm olundu. Fi’l-yevmi’r-râbi‘ aşer min Saferi’l-hayr li sene seb‘a ve semânîn ve elf. Şuhûdü hâzihi’l-hüccet aynı şuhûdi hücceti kabîli hâzihî.