|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 212 Hüküm no: 172 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Efendi b. Sinan’ın alacaklı olduğu Receb Çorbacı b. Mehmed ile sulh olduğu
Mahmiye-i İstanbul’da Karabaş mahallesi sâkinlerinden Mehmed Efendi b. Sinan nâm kimesne tarafından husûs-ı âti’l-beyâna vekîli olduğu İslâm Beşe b. Mehmed ve el-Hâc Mehmed b. el-Hâc Ahmed nâm kimesneler şehâdetleri ile şer‘an sâbit olan Sadık Beşe b. Hasan nâm kimesne meclis-i şer‘-i şerîfde mahalle-i mezbûre sâkinlerinden bâ‘is-i hâze’l-kitâb Receb Çorbacı b. Mehmed nâm kimesnenin oğlu ve tarafından husûs-ı âti’l-beyâna vekîli olduğu nehc-i şer‘î üzre sâbit olan el-Hâc Mehmed nâm kimesne mahzarında üzerine da‘vâ ve takrîr-i kelâm edip bundan akdem mezbûr Receb Çorbacı merhûm Başmakçızâde Nuh Efendi zimmetinde hakkı olan yüz yetmiş guruşu ahz u kabz ettikden sonra müvekkilim mezbûr Mehmed Efendi’den meblağ-ı mezbûr yüz yetmiş guruşu ahz u kabz ettiğinden sonra müvekkilim mezbûr Mehmed Efendi dahi ben meblağ-ı mezbûra kefâlet-i muvakkata ile kefîl olmuş idim, sen meblağ-ı mezbûru benden kefâlet-i mezbûrenin vakti çıkdığından sonra bi gayri hakkın ahzetmiş idin deyû meblağ-ı mezbûru mezbûr Receb Çorbacı’dan taleb ve da‘vâ ettiğinde, beynlerinde nizâ‘-ı küllî vukū‘undan sonra muslihûn tavassut edip mezbûr Receb Çorbacı ile beynlerinde elli guruş üzerine inşâ-i akd-i sulh ettiklerinde merkūm Mehmed Efendi dahi sulh-ı mezbûr[u] kabûl ve bedel-i sulh olan meblağ-ı mezbûru mezbûr Receb Çorbacı yedinden ahz u kabz ettiğinden sonra husûs-ı mezbûra müte‘allika âmme-i de‘âvâdan mezbûr Receb Çorbacı’nın zimmetini ibrâ-i âm ile ibrâ ve iskāt eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Saferi’l-hayr li sene seb‘a ve semânîn ve elf.
Şuhûdü’l-hâl: Hasan Efendi b. Mustafa, Yahya Çelebi b. Receb, Hacı Mehmed b. Ahmed, Mübâşir Hüseyin Beşe b. Mustafa, Ahmed Çelebi b. Mehmed, Mehmed b. Mehmed, İbrahim Beşe b. Mehmed, İslâm Beşe b. Mehmed, Mahmud b. Hüseyin ve gayruhüm.
|