|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 213 Hüküm no: 173 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Ağa b. Osman’a Mehmed Ağa b. Ali’nin elinde bulunan kaybettiği atının geri verilmesi
Mahmiye-i İstanbul’da Karaki mahallesi sâkinlerinden Ahmed Ağa b. Osman nâm kimesne meclis-i şer‘-i şerîfde Mehmed Ağa b. Ali nâm kimesne mahzarında üzerine da‘vâ ve takrîr-i kelâm edip işbu sağ kulağı kurbunda ve göğsünde ve böğürlerinde dâğı olan beyaz kır at yedimde mülk ve hakkım olup târih-i kitâbdan üç sene mukaddem mülkümden zâyi‘ olmuş idi hâlâ zikr olunan atı mezbûr Mehmed Ağa’nın yedinde bulunmağla suâl olunup alıverilmesi matlûbumdur dedikde gıbbe’s-suâl mezbûr Mehmed Ağa cevâbında mârrü’z-zikr atı târih-i mezbûrdan doksan gün mukaddem Tophâne’de sâkin topçular çorbacısı Ahmed Ağa nâm kimesne ile beynimizde ma‘lûm bir bârgirim ile mübâdele edip ber vech-i muharrer mülküm olmağla vaz‘-ı yed ederim, müdde‘î-i mezbûrun mülkü olduğu ma‘lûmum değildir deyicek müdde‘î-i mezbûr Ahmed Ağa[’dan] müdde‘âsını mübeyyine beyyine taleb olundukda udûl-ı müslimînden olup Ömer b. Mehmed ve Mehmed b. el-Hâc Halil nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mevsûf-ı mezbûr at mezbûr Ahmed Ağa’nın yedinde mülkü? ve hakkı olup târih-i mezbûrdan üç sene mukaddem mülkünden zâyi‘ olmuş idi biz bu husûsa bu vech üzre şâhidleriz, şehâdet-i şer‘iyye dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olduğundan sonra müdde‘î-i mezbûr Ahmed Ağa’ya [43b] mârrü’z-zikr atı âhara bey‘ veya hibe vücûh-ı şer‘iyyeden bir vec[hi]le ihrâc etmediğine yemîn teklîf olundukda ol dahi hasbe’l-mes’ûl half billâhi’l-aliyyi’l-a‘lâ etmeğin mûcebince mârrü’z-zikr atı müdde‘î-i mezbûr Ağa’ya def‘ ve teslîme merkūm Mehmed Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâlis aşer min Saferi’l-hayr li sene seb‘a ve semânîn ve elf min hicreti men lehü’l-izzi ve’ş-şeref.
Şuhûdü’l-hâl: Halil Çavuş b. ( ) el-Mübâşir, İbrahim Çelebi b. Ahmed, Abdullah Çelebi b. Ahmed, Mustafa Çelebi b. el-Hâc Ahmed ve gayruhüm mine’l-hâzırîn.
|