.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 214
Hüküm no: 174
Orijinal metin no: [43b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Osman Beşe b. Abdullah’ın vârislerinin kendilerine miras kalan evdeki hisselerini Ömer Çelebi b. Osman’a sattıkları

Mahmiye-i İstanbul’da hısnı ebvâbından Edirnekapısı dâhilinde el-Hâc Muhsiniddin mahallesinde sâkin iken bundan akdem vefât eden Osman Beşe b. Abdullah’ın verâseti, zevce-i metrûkesi Fâtıma bt. Mehmed ve sulbiye kebîre kızları Ayşe ve Emine Hâtun’lara ve li ebeveyn er karındaşı Sefer nâm kimesneye münhasıra ve tashîh-i mes’elesi yirmi dört sehimden olup sihâm-ı mezbûrdan üç sehmi mezbûre Fâtıma’ya ve sekiz sehmi mezbûretân Ayşe ve Emine’den her birine ve beş sehmi dahi mezbûr Sefer’e isâbet ettiği şer‘an mütehakkik oldukdan sonra zâtları ma‘rifet-i şer‘iyye ile ârifân Halil Çelebi b. İbrahim ve Mehmed Çelebi b. Ömer nâm kimesneler ta‘rîfleriyle mu‘arrefe olan mezbûrân Fâtıma ve Ayşe ve Emine meclis-i şer‘-i şerîfde bâ‘is-i hâze’l-kitâb Ömer Çelebi b. Osman nâm kimesne [mahza]rında her biri ikrâr ve takrîr-i kelâm edip mû[ri]simiz müteveffâ-yı mezbûrun terekesinden olup mahalle-i mezbûrede vâki‘ bir tarafdan Medîne-i Münevvere vakfı olan menzil ve bir tarafdan Ali Efendi mülkü ve bir tarafdan Yorgi nâm zimmî mülkü ve bir tarafdan tarîk-i âm ile mahdûd fevkānî bir bâb oda ve bir sofa ve tahtânî bir bâb oda ve kenîf ve havluyu müştemil mülk menzilden yirmi dört sehminden ber vech-i muharrer bize isâbet eden cem‘an on dokuz sehim hisse-i şâyi‘amızı, mezbûr Ömer Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile on beş bin cedîd râyic fi’l-vakt akçe[ye] bi safkatin vâhidetin bey‘ ve teslîm ol dahi ber vech-i muharrer iştirâ ve tesellüm eylediğinden semeni olan meblağ-ı mezbûr on beş bin akçeyi mezbûr Ömer Çelebi yedinden tamâmen ahz u kabz eyledik ba‘de’l-yevm menzil-i mahdûd-ı mezbûrun yirmi dört sehminden ber vech-i muharrer hissemiz olan on dokuz sehm-i şâyi‘i mezbûr Ömer Çelebi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-muzaffer li sene seb‘a ve semânîn ve elf.


Şuhûdü’l-hâl: Ahmed Efendi el-İmâm, Mehmed Efendi el-Müezzin, Halil b. İbrahim, Mehmed b. Ömer, Mustafa b. Bâli, berber Mustafa b. ( ), Mustafa Beşe b. Abdullah, İsmail Efendi b. Kalender, diğer İsmail Efendi el-Müezzin ve gayruhüm mine’l-hâzırîn.