.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 215
Hüküm no: 175
Orijinal metin no: [43b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed b. Mehmed’in Karahisarlı Sefer Çelebi b. el-Hâc Mustafa’ya borçlu olduğu

Mahmiye-i İstanbul’da Çukurbostan kurbunda solak odalarında sâkin Ahmed b. Mehmed nâm kimesne meclis-i şer‘-i şerîfde vilâyet-i Anadolu’da kasaba-i Karahisar’da Ardıç mahallesi ahâlîsinden olup mahmiye-i mezbûrda Ali Paşa hanı’nda bi tarîki’l-müsâfere sâkin bâ‘is-i hâze’l-kitâb Sefer Çelebi b. el-Hâc Mustafa nâm kimesne mahzarında ikrâr ve takrîr-i kelâm edip kösele semeninden zimmetimde mezbûr Sefer Çelebi’ye deynim olan yirmi sekiz guruşun on altı guruş ile on beş akçesini bundan akdem mezbûr Sefer Çelebi[’ye] edâ ve teslîm ol dahi ahz u kabz edip on bir guruş yüz bir akçesi bâkī kalıp ve gāib ani’l-meclis Karahisarî el-Hâc Sefer nâm kimesne zimmetinde kösele semeninden hakkı olan on altı guruş için mezbûr Sefer Çelebi’ye üzerimize üçümüz bir arada iken rızâmız ile havâle-i sahîha-i şer‘iyye ile havâle edip ben dahi mezbûr Sefer Çelebi ile havâle-i mezbûru kabûl ettiğimden sonra ol havâle olunan meblağ-ı mezbûr on altı guruşdan mezbûr Sefer Çelebi’ye bir akçe ve bir habbe vermeyip hâlâ ber vech-i muharrer havâle olunan meblağ-ı mezbûr on altı guruş elân zimmetimde deynimdir ve mezbûr Sefer Çelebi’ye ber vech-i muharrer deynim olan meblağ-ı bâkī-i mezbûr on bir guruş ve yüz beş akçe elân zimmetimde vâcibü’l-edâ ve lâzımü’l-kazâ deynimdir dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharremi’l-harâm li sene seb‘a ve semânîn ve elf.


Şuhûdü’l-hâl: Es-Seyyid Mehmed Çelebi Karahisarî, Hacızâde Mustafa Beşe, Mustafa Beşe eş-Şâmî, İbrahim Çelebi b. Ahmed, İbrahim Çelebi b. Mehmed, Ahmed Çelebi b. ( ) Karahisar[î], Ebûbekir b. Hüseyin ve gayr[uhüm].