|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 216 Hüküm no: 178 Orijinal metin no: [44a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Neccar el-Hâc Mehmed b. Veli’nin kösele bahasından Vasil v. Kosta’da alacağı olduğu
Neccâr tâ’ifesinden olup mahmiye-i İstanbul’da Büyük Karaman’da baltacı odalarında sâkin el-Hâc Mehmed b. Veli nâm kimesne meclis-i şer‘-i şerîf-i hatîr-i lâzımü’t-tevkīrde Vasil v. Kosta nâm zimmî üzerine da‘vâ ve takrîr-i kelâm edip bundan akdem mezbûr Kosta zimmetinde beynimizde ma‘lûm kösele semeninden on kıt‘a esedî guruş hakkım olmağla hâlâ taleb eylediğimde bana edâdan imtinâ‘ eder suâl olunup meblağ-ı mezbûr on kıt‘a esedî guruşun alıverilmesi matlûbumdur dedikde gıbbe’s-suâl mezbûr Kosta cevâbında fi’l-hakīka kaziyye minvâl-i muharrer üzre olup beynlerinde ma‘lûm kösele semeninden zimmetinde müdde‘î-i merkūm el-Hâc Mehmed’e on kıt‘a esedî guruş deyni olduğunu bi’t-tav‘i’s-sâf ikrâr ve i‘tirâf etmeğin mûcebince meblağ-ı mezbûr on kıt‘a esedî guruşu müdde‘î-i merkūm el-Hâc Mehmed’e edâ ve teslîme mezbûr Kosta’ya tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer fî Saferi’l-hayr li sene seb‘a ve semânîn ve elf.
Şuhûdü’l-hâl: Mehmed b. Mustafa, Kara Mustafa b. Şaban, İbrahim Çelebi b. Ahmed, Osman b. Abdullah, Mahmud b. Hasan ve gayruhüm mine’l-hâzırîn.
|