|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 217 Hüküm no: 179 Orijinal metin no: [44a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ekmekçi Marat v. Zarin’in Bağdasar v. Melkon’da alacağı olduğu
Ekmekçi tâ’ifesinden bâ‘is-i hâze’r-rakīm Marat v. Zarin nâm zimmî meclis-i şer‘-i şerîfde Bağdasar v. Melkon nâm zimmî muvâcehesinde üzerine da‘vâ ve takrîr-i kelâm edip mezbûr Bağdasar’a târih-i kitâbdan bir sene mukaddem yüz elli guruşumu ikrâz ve teslîm ol dahi yedimden iktirâz ve tesellüm ve kabz etmiş idi hâlâ mezbûr Bağdasar’a suâl olunup meblağ-ı mezbûr yüz elli guruşun alıverilmesi matlûbumdur dedikde gıbbe’s-suâl mezbûr Bağdasar cevâbında fi’l-hakīka kaziyye minvâl-i muharrer üzre olup müdde‘î-i mezbûra cihet-i karz-ı şer‘îden zimmetimde meblağ-ı mezbûr yüz elli guruş vâcibü’l-edâ ve lâzımü’l-kazâ deyni olduğunu ikrâr ve i‘tirâf etmeğin mûcebince meblağ-ı mezbûr yüz elli [44b] guruşu müdde‘î-i mezbûra edâya mezbûr Bağdasar’a tenbîh olunmağın mâ vaka‘a bi’t-taleb ketb olundu. Fi’l-yevmi’s-sâdis aşer min Saferi’l-hayr li sene seb‘a ve semânîn ve elf.
Şuhûdü’l-hâl: Hasan Beşe b. el-Hâc Murad el-Mübâşir, Hüseyin Beşe b. Satı, Halil Ağa b. Mehmed, Bayezid b. Rüstem, İbrahim Çelebi b. Ahmed, Osman Çelebi b. Ömer ve gayruhüm mine’l-hâzırîn.
|