|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 217 Hüküm no: 180 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Safiye bt. Mustafa’nın Gemlik’teki bağını Hasan b. Ahmed’e sattığı
Mahmiye-i İstanbul’da Ahîzâde mahallesi sâkinelerinden Safiye bt. Mustafa nâm hâtun tarafından husûs-ı âti’l-beyâna vekîl olup vekâleti mahalle-i mezbûre sâkinlerinden Mustafa b. Abdullah [ve] es-Seyyid Mehmed Çelebi b. Ahmed nâm kimesneler şehâdetleri ile şer‘an sâbit olan Ahmed Çelebi b. Hasan nâm kimesne meclis-i şer‘-i şerîfde bâ‘is-i hâze’l-kitâb Hasan b. Ahmed nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilim mezbûrun yedinde mülk ve hakkı olup vilâyet-i Anadolu’da Gemlik kazâsına tâbi‘ Kastelli nâm karye sınırı dâhilinde vâki‘ bir tarafdan Mustafa nâm kimesne bağı ve bir tarafdan Halil ve bir tarafdan Hamamcıoğlu Hasan bağı ve bir tarafdan sâhil-i bahr ile mahdûd bağını on yedi esedî guruşu müvekkilem mezbûre Safiye Hâtun mezbûr Mustafa’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm eyledikden sonra semeni olan meblağ-ı mezbûr on yedi guruşu müvekkile-i mezbûre merkūm Hasan yedinden tamâmen ahz u kabz eyledi ba‘de’l-yevm sâlifü’z-zikr bağ-ı mezbûr Hasan’ın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer fî Saferi’l-hayr li sene seb‘a ve semânîn ve elf.
Şuhûdü’l-hâl: Hüseyin Çelebi b. Mehmed, Mustafa Çelebi b. ( ), Halil b. Mehmed, Değirmencioğlu Hasan, Ali b. el-Hâc Ahmed ve gayruhüm mine’l-hâzırîn.
|