|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 218 Hüküm no: 181 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Safiye bt. Şaban’ın evini Tevfikî Mehmed Efendi Vakfı mütevellisi el-Hâc Ahmed b. Ali’ye bey‘ bi’l-istiğlâl yoluyla sattığı
Mahmiye-i İstanbul’da Cafer Ağa mahallesi sâkinelerinden Safiye bt. Şaban nâm hâtun zât[ını] ma‘rifet-i şer‘iyye ile ârifân zevci el-Hâc Kenan b. Abdullah ve Mehmed Çelebi b. ( ) nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde mahmiye-i mezbûrede Tevfîkî Mehmed Efendi vakfına hâlâ mütevellî olan bâ‘is-i hâze’l-kitâb el-Hâc Ahmed b. Ali nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan ba‘zan Belkıs Hâtun ve ba‘z[an] Hidâyet Efendi mülkü ve bir tarafdan Arabacıbaşı Abdi mülkü ve bir tarafdan tarîk-i âm ile mahdûd büyût-ı adîdeyi müştemil menzilini, mütevellî-i mezbûr el-Hâc Ahmed’e yüz altmış esedî guruşa bi tarîki’l-istiğlâl bey‘ ve teslîm ol dahi yedinde olan mâl-ı vakf-ı mezbûr ile iştirâ ve tesellüm ve semen-i mezbûru bana def‘ ve teslîm ben dahi yedinden ahz u kabz ettiğimden sonra mütevellî-i mezbûr el-Hâc Ahmed menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î senede yirmi dört guruşa olmak üzre üzerine târih-i kitâbdan üç sene tamâmına değin altmış iki esedî guruşa bana îcâr ve teslîm [ben dahi] minvâl-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î menzil-i mahdûd-ı mezbûrun derkine ve ücret-i lâzımesine zevci hâzır bi’l-meclis mezbûr el-Hâc Kenan tarafından emir ve kabûlü hâviye kefâlet ile kefîl olmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.
Şuhûdü’l-hâl: İbrahim Çelebi b. ( ), İmâm Musa Efendi, İmâm İshak Efendi, Abdünnebi Çelebi, Uzun Ahmed Çelebi, Abdi Çelebi ve gayruhüm.
|