.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 219
Hüküm no: 182
Orijinal metin no: [44b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hacı Fâtıma bt. el-Hâc Ali’nin evini Keçeci Pîrî mahallesinden Fâtıma bt. Ebûbekir’e sattığı

Mahmiye-i İstanbul’da Karabaş mahallesi sâkinelerinden olup zâtını ma‘rifet-i şer‘iyye ile ârifân Halil Çelebi b. Mehmed ve Hasan Beşe b. Abdullah nâm kimesneler ta‘rîfleri ile mu‘arrefe olan Hacı Fâtıma bt. el-Hâc Ali nâm hâtun meclis-i şer‘-i şerîf-i lâzımü’t-tevkīrde mahmiye-i mezbûrede Keçeci Pîrî mahallesi sâkinelerinden bâ‘is-i hâze’l-kitâb diğer Fâtıma bt. Ebûbekir nâm hâtun tarafından husûs-ı âti’l-beyâna vekîl olup Mustafa Efendi b. Ahmed ve Hacı Mehmed b. Sefer nâm kimesneler şehâdetleri ile şer‘an vekâleti sâbite olan zevci Mustafa Bey b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin [45a] sudûruna değin yedimde mülküm ve hakkım olup zikr olunan Keçeci Pîrî mahallesinde vâki‘ iki tarafdan müşteriye-i mezbûre Fâtıma mülkü ve bir tarafdan Eyyûb Çelebi mülkü ve bir tarafdan tarîk-i hâs ile mahdûd fevkānî iki bâb oda ve iki sofa ve bir dîvânhâne ve dehliz ve tahtında bir kiler ve matbah ve cüneyne ve kenîfi ve havluyu müştemil mülk menzilimi, bi cümleti’t-tevâbi‘ ve’l-levâhık ve kâffe-i hukūk ve merâfıkı ile müvekkile-i mezbûre diğer Fâtıma’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile on beş bin fıddî râyic fi’l-vakt akçeye bey‘ ve teslîm müvekkile-i mezbûre dahi iştirâ ve tesellüm eyledikden sonra semeni olan meblağ-ı mezbûr on beş bin akçeyi müvekkile-i mezbûre diğer Fâtıma Hâtun yedinden bi’t-tamâm ahz u kabz eyledim ba‘de’l-yevm menzil-i mahdûd-ı mezkûr müvekkilem mezbûre diğer Fâtıma’nın mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer li sene seb‘a ve semânîn ve elf.


Şuhûdü’l-hâl: Mehmed Efendi b. Yusuf el-İmâm, Mehmed Çelebi b. Mustafa el-Müezzin, Halil Çelebi b. Mehmed, Mehmed Çelebi b. Beşir, Hasan Beşe b. Abdullah, İbrahim Çelebi b. Ahmed, el-Hâc Mustafa b. Tevekkül, Osman b. Ömer ve gayruhüm.