.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 219
Hüküm no: 183
Orijinal metin no: [45a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


el-Hâc Kaya’nın para vakfına mütevelli olan Halil Efendi b. Ali’nin eski mütevelli Ali Çelebi b. Hasan’da olan alacağı taksitlendirdiği

Mahmiye-i İstanbul’da Şehremini kurbunda Mustafa Çavuş mescid-i şerîfinde tilâvet olunan eczâ-i şerîfe için merhûm el-Hâc Kaya nâm sâhibü’l-hayrın nukūd-ı mevkūfesine bi’l-fi‘l mütevellîsi olan Halil Efendi b. Ali nâm kimesne meclis-i şer‘-i şerîfde vakf-ı mezbûreye sâbıkan mütevellî olan Ali Çelebi b. Hasan nâm kimesne mahzarında ikrâr ve ta‘bîr ani’l-merâm edip mezbûr Ali Çelebi bundan akdem vakf-ı mezbûra mütevellî iken vâkıf-ı mezbûrun ber vech-i muharrer nukūd-ı mevkūfesi olan beş yüz altmış iki buçuk riyâlî guruşunu tevliyyet-i mahkiyesi hasebiyle ahz u kabz eylediğimden sonra meblağ-ı mezbûrun üç yüz seksen üç buçuk guruşunu kendi mesârifine sarf ile istihlâk ettikden sonra tevliyyet-i mezbûrdan azl olunup yerine ben mütevellî nasb olunduğumda ber vech-i muharrer istihlâk eylediği meblağ-ı mezbûru mezbûr Ali Çelebi’den yedimde olan hüccet-i şer‘iyye nâtıka olduğu üzre huzûr-ı hâkimü’ş-şer‘ ile da‘vâ ve taleb eylediğimde, nukūd-ı merkūmeden ber vech-i muharrer istihlâk eylediğim ancak üç yüz elli bir guruşdur deyû ziyâde kabzını inkâr ettikden sonra ikrârı mertebesi meblağ-ı mezbû[r] üç yüz elli bir guruşu bana edâya merkūm Ali Çelebi üzerine hükm-i şer‘î lâhık olmuş idi, lâkin mezbûr Ali Çelebi meblağ-ı mezbûr üç yüz elli bir guruş hâlâ edâya iktidârı olmamağla taksîte tâlib olmağın ben dahi meblağ-ı mezbûr üç yüz elli bir guruşu her ulûfede onar guruş vermek üzre taksît edip ol dahi meblağ-ı mezbûru ber vech-i muharrer bana edâya ta‘ahhüd ve iltizâm eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Mehmed Efendi el-İmâm, Mustafa Çelebi el-İmâm, Hasan b. Mustafa el-Müezzin, Mehmed Efendi b. Mehmed, İbrahim b. Mehmed ve gayruhüm.