.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 220
Hüküm no: 184
Orijinal metin no: [45a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Merhum Kaptanıderya Ali Paşa’nın terekesinden Mustafa b. Ahmed’in alacağının ödenmesi

Min hattıhî Sarrâc tâ’ifesinden olup mahmiye-i İstanbul’da Mimar Ayas mahallesi sâkinlerinden bâ‘is-i hâze’l-kitâb Mustafa b. Ahmed nâm kimesne meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi Rukiye Hanım bt. el-merhûm Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîre kızları Aliye Hanım ve Hümâ Hanım ve sulbiye sagīre kızı Ayşe Hanım’a münhasır olduğu şer‘an sâbit oldukdan sonra müteveffâ-yı [45b] mezbûr Ali Paşa’nın tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun kethüdâsı Ahmed Ağa b. Ali ve etbâ‘ından Abdülbâkī Ağa b. Ahmed nâm kimesneler şehâdetleri ile şer‘an sâbit olan Ömer Efendi b. Hüseyin nâm kimesne ile kezâlik müteveffâ-yı mezbûrun tereke-i vâfiyesine vâzı‘ü’l-yed olan mûmâ-ileyh Mehmed Bey mahzarlarında üzerlerine da‘vâ ve takrîr-i kelâm edip müteveffâ-yı mezbûr Ali Paşa zimmetinde hayâtında yedimden iştirâ ve kabz eylediği beynimizde ma‘lûm sarrâc metâ‘ı bahâsından altmış dört guruş hakkım olup hattâ ikrâr dahi ettiğinden sonra meblağ-ı mezbûru kable’l-edâ merkūm Ali Paşa vefât edip zimmetinde kalmağla hâlâ merkūmân Mehmed Bey ve Ömer Efendi’ye suâl olunup meblağ-ı mezbûr altmış dört guruşu müteveffâ-yı mezbûrun tereke-i vâfiyesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa ile hazînedârı olan diğer Ahmed Ağa b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Paşa hayâtında müdde‘î-i mezbûr Mustafa Çelebi yedinden iştirâ ve kabz eylediği beynlerinde ma‘lûm sarrâc metâ‘ı bahâsından zimmetinde müdde‘î-i mezbûra olan vâcibü’l-edâ ve lâzımü’l-kazâ altmış dört guruş deyni olduğunu bizim huzûrumuzda ikrâr ve bizi işhâd etmiş idi biz bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince meblağ-ı mezbûr altmış dört guruşu müteveffâ-yı merkūmun tereke-i vâfiyesinden müdde‘î-i mezbûr Mustafa Çelebi’ye edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin aşer min Saferi’l-hayr li sene seb‘a ve semânîn ve elf.


Şuhûdü’l-hâl: Fahrü’l-akrân el-Hâc Kemaleddin Kethüdâ-yı Hazret-i Efendi, el-Hâc Mehmed b. Ali, el-Hâc Mehmed b. Receb, Musa Halîfe b. Receb, Mustafa Beşe b. Abdullah.