.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 221
Hüküm no: 185
Orijinal metin no: [45b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Erzurumlu Yakub Efendi b. Ümmetünnebi’nin bir ev alımı işini kolaylaştırması için Ahmed Çelebi b. Mehmed’e rüşvet olarak verdiği kahve ve paranın iade edilmesi

Min hattıhî Medîne-i Erzurum’da Sultan Melik mahallesi ahâlîsinden olup misâfiren mahmiye-i İstanbul’da Hobyar mahallesinde sâkin bâ‘is-i hâze’l-kitâb Yakub Efendi b. Ümmetünnebi nâm kimesne meclis-i şer‘-i şerîfde hâlâ medîne-i mezbûre kadısı olan Mehmed İffetî Efendi’nin kethüdâsı olan Ahmed Çelebi b. Mehmed nâm kimesne mahzarında üzerine da‘vâ ve takrîr-i kelâm edip târih-i kitâbdan sekiz ay mukaddem medîne-i mezbûrede bir menzil husûsunun temşiyyeti için bi tarîki’l-rüşvet mezbûr Ahmed Çelebi’ye altı batman olmak üzre otuz altı vakıyye kahve ile yüz yetmiş beş esedî guruşumu def‘ ve teslîm ol dahi ahz u kabz ve istihlâk ettikden sonra husûs-ı mezbûrun dahi husûlü müyesser olmamağla, hâlâ mezbûr Ahmed Çelebi’ye suâl olunup ber vech-i muharrer benden ahz u kabz eylediği otuz altı vakıyye kahvenin mislini ve meblağ-ı mezbûr yüz yetmiş beş esedî guruşu bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda medîne-i mezbûrede Hasan Basri mahallesi ahâlîsinden olup misâfiren mahmiye-i mezbûrede Zeyrek kurbunda Sovukkuyu medresesinde sâkin Ahmed Bey b. Hasan ve Ömer Bey b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i kitâbdan sekiz ay mukaddem müdde‘î-i mezbûr Yakub Efendi medîne-i mezbûrede bir menzil husûsunun temşiyyeti için bi tarîki’l-rüşvet otuz altı vakıyye kahvesini ve yüz yetmiş beş esedî guruşunu merkūm Ahmed Çelebi’ye bizim huzûrumuzda def‘ ve teslîm ol dahi ahz u kabzetmiş idi biz bu husûsa bu vech üzre [46a] şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘-i şerîfden irsâl olunan Mevlânâ es-Seyyid Muharrem Efendi b. es-Seyyid İsmail Mahmud Paşa câmi‘-i şerîfi kurbunda Tahtahanı’na varıp medîne-i mezbûre ahâlîsinden olup misâfiren zikr olunan handa sâkin Mehmed b. el-Hâc Sâlih ve Sıddık b. Muslu ve Sa‘d b. Ali ve Nasûh b. Musa nâm kimesnelerden şâhidân-ı mezbûrân Ahmed Bey ve Ömer Bey’in keyfiyyet-i hâllerini suâl eyledikde her biri şâhidân-ı mezbûrân için adl ve makbûlü’ş-şehâdedir velev aleynâ deyû haber verdiklerini mahallinde tahrîr ve ma‘an irsâl olunan Durmuş b. Veli ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olunduklarından sonra şehâdetleri makbûle olmağın mûcebince zikr olunan otuz altı vakıyye kahvenin mislini ve meblağ-ı mezbûr yetmiş beş esedî guruşu müdde‘î-i mezbûr Yakub Efendi’ye edâ ve teslîme mezbûr Ahmed Çelebi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene seb‘a ve semânîn ve elf.


Şuhûdü’l-hâl: El-Hâc Hüseyin Ağa b. Üveys, Fahrü’l-akrân el-Hâc Kemaleddin Ağa b. Müyesser, Musa Halîfe b. Receb, el-Hâc Hasan Beşe çukadâr ve gayruhüm.