.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 222
Hüküm no: 186
Orijinal metin no: [46a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kaptanıderya Ali Paşa’nın terekesinden Mehmed Ağa b. Ahmed’in Kalamata hassı iltizam bedelinden olan alacağının ödenmesi

Mahmiye-i İstanbul’da Mimar Sinan mahallesi sâkinlerinden bâ‘is-i hâze’l-kitâb Mehmed Ağa b. Ahmed nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. el-merhûm Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîre kızları Aliye Hanım ve Hümâ Hanım’a ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun terekesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve sulbiye kebîre kızları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun hazînedârı Ahmed Ağa b. Abdullah ve etbâ‘ından Abdülbâkī Ağa b. Ahmed nâm kimesneler şehâdetleriyle şer‘an sâbit olan Ömer Efendi b. Hüseyin nâm kimesne ile mûmâ-ileyh Mehmed Bey mahzarlarında üzerlerine da‘vâ ve takrîr-i kelâm edip müteveffâ-yı merkūm Ali Paşa’nın hayâtında kapudanlık hâslarından Kalamata hâssının bin seksen altı senesinde hâsıla olacak mahsûlünü dört yüz elli guruşa bana der-uhde ben dahi iltizâm ve kabûl edip meblağ-ı mezbûrun ber vech-i peşîn iki yüz elli guruşunu merkūm Ali Paşa’ya def‘ ve teslîm ol dahi ahz u kabz edip hattâ şuhûd mahzarında ikrâr dahi ettiğinden sonra zikr olunan hâssı zabt etmezden mukaddem merkūm Ali Paşa vefât edip meblağ-ı mezbûr zimmetinde kalmağla merkūmân Mehmed Bey ve Ömer Efendi’ye suâl olunup meblağ-ı mezbûr[u] müteveffâ-yı mezbûrun terekesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i merkūmdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa hazînedârı olan diğer Ahmed Ağa b. Abdullah nâm kimesneler li ecli’ş-şehâde meclis-i şer‘a hâzırân olunup istişhâd olunduklarında fi’l-hakīka müteveffâ-yı mezbûr Ali Paşa hayâtında zikr olunan Kalamata hâssını müdde‘î-i mezbûr Mehmed Ağa’ya dört yüz elli guruşa der-uhde ve meblağ-ı mezbûrun iki yüz elli guruşunu ber vech-i peşîn müdde‘î-i mezbûr yedinden ahz u kabz ettiğini mezbûr Ali Paşa hayâtında bizim huzûrumuzda ikrâr ve bizi işhâd etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince meblağ-ı [46b] mezbûr iki yüz elli guruşu müteveffâ-yı mezbûrun tereke-i vâfiyesinden müdde‘î-i merkūm Mehmed Ağa’ya edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Kıdvetü’l-erbâbü’t-tahrîr ve’l-kalem Hasan Efendi tezkire-i ûlâ, umdetü ashâbü’t-tastîr ve’r-rakam Yusuf Efendi tezkire-i sâniye, kıdvetü’l-emâsil ve’l-akrân çavuşbaşı Murad Ağa, fahrü’l-akrân el-Hâc Kemaleddin Kethüdâ-yı Hazret-i Efendi, el-Hâc Hüseyin Ağa b. Üveys.