.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 224
Hüküm no: 187
Orijinal metin no: [46b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sakız kazası Todonya köyünden Kostantin v. Yorgi’nin Sakız kadısı Ahmed Efendi’ye rüşvet olarak para verdiğini ispatlayamadığı

Vilâyet-i Rumeli’nde medîne-i Sakız kazâsına tâbi‘ Podonya? nâm karye ahâlîsinden Kostantin v. Yorgi nâm zimmî meclis-i şer‘-i şerîfde sâbıkan medîne-i mezbûre kadısı olan umdetü’l-mevâli’l-izâm Ahmed Efendi tarafından husûs-ı âti’l-beyâna vekîl olduğu Receb Beşe b. Şaban ve Osman Çelebi b. Mustafa nâm kimesneler şehâdetleri ile şer‘an sâbit olan Mehmed Efendi b. İbrahim nâm kimesne mahzarında üzerine da‘vâ ve takrîr-i kelâm edip müvekkil-i mûmâ-ileyh bundan akdem medîne-i mezbûrede kadı iken Tercüman Pîro nâm zimmî yediyle bi tarîki’l-rüşvet yirmi esedî guruşu ahz u kabz etmeğin suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda isbât-ı beyyineden izhâr-ı acz ile istihlâf etmeğin tahlîfi [için] savb-ı şer‘den Mevlânâ Mustafa Efendi b. Abdülaziz irsâl olunup ol dahi mûmâ-ileyh Ahmed Efendi’nin mahmiye-i merkūmede Ali Paşa mahallesinde sâkin olduğu menziline varıp zeyl-i vesîkada muharrerü’l-esâmî olan müslimîn huzûrunda mûmâ-ileyh Ahmed Efendi’ye müdde‘î-i mezbûrun merkūm Piro nâm zimmî yediyle ber vech-i muharrer yirmi esedî guruşu ahz u kabz etmeyip elân üzerine red ve zamândan nesne lâzım olmadığına yemîn teklîf olundukda ol dahi alâ ve[fki’]l-mes’ûl yemîn billâhi’l-alî eylediği Mevlânâ-yı mezbûr mahallinde tahrîr ve ma‘an irsâl olunan Mehmed b. Abdullah ile meclis-i şer‘a gelip alâ vukū‘ihi inhâ [ve] takrîr etmeğin mûcebiyle müdde‘î-i mezbûr bilâ-beyyine bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Saferi’l-hayr li sene seb‘a ve semânîn ve elf.


Şuhûdü’l-hâl: İbrahim Çelebi b. Ahmed, Hasan Beşe b. Çukadâr, Hüseyin Çelebi b. Üveys, Musa Çelebi b. Receb, Mustafa Çelebi Kahveci ve gayruhüm mine’l-hâzırîn.