.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 224
Hüküm no: 188
Orijinal metin no: [46b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Silivri kasabası menzilciliğini Arslan v. Gazal ile Toros v. Haçok’un ortak olarak yapacaklarının tesbiti

Kasaba-i Silivri menzilcisi olan Arslan v. Gazal nâm zimmî meclis-i şer‘-i şerîfde Toros v. Haçok muvâcehesinde takrîr-i kelâm ve ta‘bîr ani’l-merâm edip atebe-i aliyye-i sultâniye ve südde-i seniyye-i hâkāniyye tarafından kasaba-i mezbûre menzilciliğini bin seksen altı ve seksen yedi senesine mahsûb olmak üzre her senesi dört yük akçeye bana der-uhde olunmağla ben dahi iltizâm ve kabûletmiş idim hâlâ vech-i muharrer üzre der-uhde eylediğim menzilcilik ve ma‘lûmü’l-erbâb düyûnumuz olan dört yük akçe ve yedimde olan hüccet-i şer‘iyye nâtıka olduğu vech üzre bundan akdem vefât eden Osman Bey nâm kimesne terekesinden olup taraf-ı mîrîden iştirâ ve kabz eylediğim kasaba-i mezbûrede Kasımpaşa mahallesinde vâki‘ ma‘lûmü’l-hudûd menzil ve kasaba-i mezbûre yalısında vâki‘ ma‘lûmü’l-hudûd mahzen ve beynimizde adedi ma‘lûm menzil bârgirleri ve âlât-ı lâzımeleri mezbûr Toros ile beynimizde iştirâk-i seviy üzre olup zikr olunan menzilciliğe ikimiz ale’l-iştirâk mutasarrıf olup ve düyûn-ı mezkûru ikimiz ale’l-iştirâk erbâbına edâ edip ve emlâk-i mezbûre ale’l-iştirâki’s-seviy mülkümüz olmak üzre kavl ü ittifâk ve ahd ü mîsâk eyledik dedikde mezbûr Toros dahi mukırr-ı merkūmu kelimât-ı meşrûhasında tasdîk ve tahkīk etmeğin mâ vaka‘a hıfzan li’l-makāl ketb olundu. Fi’l-yevmi’l-hâdî ve’l-ışrîn min Saferi’l-hayr li sene seb‘a ve semânîn ve elf.


Şuhûdü’l-hâl: Mehmed Çelebi b. Hüseyin, Abdullah Efendi el-İmâm, Ahmed Efendi el-İmâm, Ahmed Efendi hamamcı, Ahmed Çelebi b. Abdullah, Yahya Beşe b. Abdullah, el-Hâc Mehmed el-Müezzin, es-Seyyid Muharrem Efendi, İbrahim Çelebi b. Mehmed, Haçador v. Arslan.