|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 225 Hüküm no: 189 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Havvâ bt. Abdüsselâm’ın Bitpazarı’nda yaptırdığı hanı Osman Ağa b. Mehmed’e sattığı
Mahmiye-i İstanbul’da Kaliçeci Hasan mahallesi sâkinelerinden Havvâ bt. Abdüsselâm nâm hâtun tarafından ber vech-i âtî vekâlet iddi‘â eden fahrü’l-akrân İdris Çelebi b. Yahya nâm kimesne meclis-i şerî‘at-ı şerîfe-i garrâda umdetü’l-emâcid ve’l-ekârim câmi‘ü’l-mehâsin ve’l-mekârim bâ‘is-i hâze’l-kitâb Osman Ağa b. Mehmed nâm kimesne mahzarında üzerine da‘vâ ve takrîr-i kelâm edip müvekkilem mezbûre Havvâ Hâtun mahmiye-i mezbûre esvâkından Bitpazarı’nda Ali Paşa-yı Cedîd hanı kurbunda vâkı‘a bir tarafdan ba‘zan tarîk-i âm ve ba‘zan medîne-i Üsküdar’da câmi‘-i şerîfi olan merhûm Gülfem vakfı ve bir tarafdan ba‘zan Yağlıkçı Sinan Beşe mülkü ve ba‘zan el-Hâc Ali vakfı ve bir tarafdan ba‘zan Mercan Ağa vakfı ve ba‘zan Ahî Durmuş Baba mescid-i şerîfi ve bir tarafdan tarîk-i âm ile mahdûd tûlen on beş ve arzen yedi buçuk zirâ‘ bi hesâb-ı terbî‘î yüz on iki buçuk zirâ‘ı merhûm-ı merkūm Gülfem vakfından senede üç yüz altmış akçe mukāta‘a ve bâkī bir su kuyusu ve zîr-i zemînde bir mahzeni müştemile olan mikdârı merhûm-ı mezbûr Ahî Durmuş Baba vakfından senede bin altı yüz seksen akçe mukāta‘a ile tasarrufunda olan ebniyesi muhterika arsa üzerine re’y-i hâkim ve vakfeyn-i mezkûreynin mütevellîleri izinleri ve malı ile nefsi için mülkü olmak üzre bundan akdem binâ eylediği fevkānî ve tahtânî on altısı ocaklı üçü ocaksız demir kapılı demir pencereli on dokuz bâb kârgir oda ve iki kârgir kenîf ve bir su musluğu ve bir mikdâr havlu ve bozmacılar? sûku tarafında üç kârgir dükkân ve kapısının birisi sağ ve birisi sol tarafında zîr-i zemînde biri kârgir mahzeni hâvî beş kârgir dükkânı müştemil bir kârgir mülk hanını cemî‘ tevâbi‘ ve levâhıkı ve âmme-i hukūk ve merâfıkı ile bi’l-vekâle merkūm Osman Ağa’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile sekiz bin üç yüz kıt‘a esedî guruşa bey‘ ve teslîm ol dahi ber vech-i muharrer iştirâ ve tesellüm etmekle hâlâ mezbûr Osman Ağa’ya suâl olunup semeni olan meblağ-ı mezbûr sekiz bin üç yüz esedî guruşun bi’l-vekâle alıverilmesi matlûbumdur dedikde gıbbe’s-suâl merkūm Osman Ağa cevâbında fi’l-hakīka müdde‘î-i mezbûrdan mezbûre Havvâ’nın zikr olunan hanını ber vech-i muharrer iştirâ ve tesellüm ettiğini ikrâr, lâkin müdde‘î-i mezbûr İdris Çelebi’nin merkūme Havvâ Hâtun tarafından ber vech-i muharrer vekîl olduğu ma‘lûmum değildir demeğin müdde‘î-i mezbûrdan ber vech-i muharrer vekâletine beyyine taleb olundukda udûl-ı müslimînden olup mahmiye-i merkūmede Kabasakal mahallesinde sâkin Abdullah Efendi b. Halil ve Emin Bey mahallesi ahâlîsinden Mehmed Efendi b. Hasan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Havvâ Hâtun ber vech-i muharrer yedinde mülk ve hakkı olan sâlifü’z-zikr hanı merkūm Osman Ağa’ya sekiz bin üç yüz esedî guruşa bey‘ ve teslîm ve semeni olan meblağ-ı mezbûr sekiz bin üç yüz esedî guruşunu yedinden ahz u kabza ve kendiye îsâle ve bey‘ ve îsâl ve kabz mütevakkıf olduğu umûrun küllîsine tarafından müdde‘î-i mezbûr İdris Çelebi’yi bizim huzûrumuzda vekîl ve menâbına nâib nasb ve ta‘yîn edip ol dahi vekâlet-i mezbûreyi kabûletmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükmi’ş-şer‘î vekîl-i mezbûr İdris Çelebi’den ber vech-i muharrer iştirâ ve tesellüm eylediği sâlifü’z-zikr hanın semeni olan meblağ-ı mezbûr sekiz bin üç yüz esedî guruşunu müdde‘î-i mezbûr İdris Çelebi’ye edâ ve teslîme merkūm Osman Ağa’ya tenbîh olundukdan sonra vekîl-i mezbûr İdris Çelebi meclis-i şer‘a i‘âde-i kelâm edip ânifen edâsına tenbîh olunan semen-i mezkûr sekiz bin üç yüz esedî guruşu vekâlet-i mahkiyem hasebiyle merkūm Ağa yedinden tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer min Saferi’l-hayr li sene seb‘a ve semânîn ve elf.
Şuhûdü’l-hâl: İdris Bey bevvâb-ı sultânî, Kara Ahmed el-Karamanî, Hasan Bey b. Ali, Mehmed Çelebi b. Osman, Hüseyin b. Abdullah, Abdullah Çelebi b. Mehmed, Ali Beşe b. Hasan, Mustafa Çelebi b. Hasan, celeb Ali Çavuş, Ankaralı es-Seyyid Veli b. Ali, Mehmed Efendi b. Abdülgaffâr, İbrahim Çelebi b. Mehmed, Ebûbekir b. Hüseyin, Abdi Çelebi b. Ali, Mustafa b. Ali, Mustafa b. Abdünnebi ve gayruhüm mine’l-hâzırîn.
|