.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 227
Hüküm no: 190
Orijinal metin no: [47b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Cide, Derebucak köyü ahalisinden Mehmed b. Mustafa’nın mezraadan elde ettiği mahsulün öşrünü timar sahiplerine vermesi gerektiği

Vilâyet-i Anadolu’da Kastamonu sancağında Cide kazâsı ahâlîsinden Mehmed Efendi b. Yahya nâm kimesne meclis-i şer‘-i şerîfde kazâ-i mezbûra tâbi‘ Güran nâhiyesinde Derebucağı nâm karye ahâlîsinden Mehmed b. Mustafa nâm kimesne mahzarında üzerine da‘vâ ve takrîr-i kelâm edip bir tarafdan karye-i mezbûre ve bir tarafdan Devrekâni ırmağı ve iki tarafdan kaya ile mahdûd olup hâlâ mezbûr Mehmed’in taht-ı tasarrufunda olan arâzinin mezra‘adârlığı berât-ı şerîf-i âlîşân ile? bana ta‘yîn olunmuşiken, mezbûr Mehmed arâzi-i mezbûrede senede hâsıl olan mahsûlünün öşrünü bana teslîmden imtinâ‘ eder hâlâ mezbûr Mehmed’e suâl olunup arâzi-i mezkûrede her sene hâsıl olan mahsûlün öşrünü bana teslîme tenbîh olunmak matlûbumdur dedikde gıbbe’s-suâl mezbûr Mehmed cevâbında zikr olunan arâzi Ali Bey ve Osman Bey ve Ahmed Bey nâm sipâhilerin müşterek timarı arâzisinden olmağla zikr olunan arâzide her sene hâsıl olan mahsûlün öşrünü merkūmûn Ali Bey ve Osman Bey ve Ahmed Bey’e teslîm etmiş idim deyicek mezbûrûn Ali Bey ve Osman Bey ve Ahmed Bey ile huzûr-ı hâkimü’ş-şer‘de mürâfa‘a olup mezbûr Mehmed’den arâzi-i mezkûrenin her sene hâsıl olan öşrünü taleb ile terâfu‘ etmek üzre mezbûr Mehmed Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene seb‘a ve semânîn ve elf.


Şuhûdü’l-hâl: El-Hâc Kemaleddin Ağa Kethüdâ-yı Hazret-i Efendi, el-Hâc Hüseyin Ağa b. Üveys, Musa Halîfe b. Receb, Mustafa Beşe b. Abdullah ve gayruhüm.