|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 227 Hüküm no: 191 Orijinal metin no: [47b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ekmekçi Ovanes v. Kirakos’un Marat v. Zarin ile alacak davasında sulh olduğu
Ekmekçi tâ’ifesinden olup mahmiye-i İstanbul’da Bâlipaşa kurbunda ekmekçi olan Ovanes v. Kirakos nâm zimmî meclis-i şer‘-i şerîfde tâ’ife-i mezbûreden bâ‘is-i hâze’s-sifr Marat v. Zarin nâm zimmî mahzarında ikrâr ve takrîr-i kelâm edip mezbûr Marat zimmetinde cihet-i deyn-i şer‘îden yirmi bir bin akçe hakkım olmağla meblağ-ı mezbûru merkūm Marat’dan da‘vâ ve taleb eylediğimde ol dahi inkâr etmeğin beynimizde nizâ‘-ı küllî vukū‘undan sonra muslihûn tavassut edip mezbûr Marat ile yüz esedî guruş üzerine beynimizde inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz esedî guruşu merkūm Marat yedinden tamâmen ahz u kabz ettiğimden sonra husûs-ı mezkûra ve târih-i kitâba gelince beynimizde cereyân eden ahz ve i‘tâ ve mu‘âmelât-ı şettâya müte‘allika âmme-i de‘âvî ve mütâlebâtdan ben mezbûr Marat’ın zimmetini ibrâ-i âm ile ibrâ ve iskāt edip ve mezbûr Marat dahi benim zimmetimi ibrâ ve iskāt eyledi ba‘de’l-yevm vechen mine’l-vücûh biri birimiz ile da‘vâ ve nizâ‘ımız yoktur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene seb‘a ve semânîn ve elf.
Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Veli Beşe el-Muhzır, Hasan Beşe el-Mübâşir, Mehmed b. Bayram.
|