|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 228 Hüküm no: 192 Orijinal metin no: [47b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Ebûbekir’in evinin yarısını kocası Mustafa Bey b. Mehmed’e sattığı
Mahmiye-i İstanbul’da Keçeci Pîrî mahallesi sâkinelerinden Fâtıma bt. Ebûbekir nâm hâtun tarafından husûs-ı âti’l-beyâna vekîl olup vekâleti mahalle-i mezbûre sâkinlerinden Mustafa Efendi b. Ahmed ve Halil Çelebi b. Mehmed nâm kimesneler şehâdetleri ile şer‘an sâbite olan el-Hâc Mehmed b. Sefer nâm kimesne meclis-i şer‘-i şerîfde müvekkile-i mezbûrenin zevci bâ‘is-i hâze’l-kitâb Mustafa Bey b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûrenin yedinde mülk ve hakkı olup mahalle-i mezbûrede vâki‘ iki tarafdan kendi mülkü olan menzil ve bir tarafdan Eyyûb Çelebi mülkü ve bir tarafdan tarîk-i hâs ile mahdûd fevkānî iki bâb oda ve iki sofa ve bir dîvânhâne ve tahtında bir kiler ve bir matbah ve havlu ve kenîfi ve cüneyneyi müştemil mülk menzilinin nısf-ı şâyi‘ini, zevci mezbûr Mustafa Bey tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yedi bin beş yüz râyic fi’l-vakt akçeye bey‘ ve teslîm ol dahi ber vech-i muharrer iştirâ ve tesellüm eylediğinden sonra semeni olan meblağ-ı mezbûr yedi bin beş yüz akçeyi müvekkile-i mezbûre merkūm Mustafa Bey yedinden tamâmen ahz u kabz eyledi ba‘de’l-yevm menzil-i mahdûd-ı mezkûrun nısf-ı şâyi‘i zevci mezbûr [48a] Mustafa Bey’in mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Saferi’l-hayr li sene seb‘a ve semânîn ve elf.
Şuhûdü’l-hâl: Mehmed Efendi b. Yusuf el-İmâm, Mustafa Çelebi b. Ömer, Mehmed Çelebi b. Mustafa el-Müezzin, el-Hâc Hasan b. İbrahim, el-Hâc Mehmed b. Receb, Hasan Çelebi b. Abdullah, el-Hâc Şâhin b. Abdullah, İbrahim Çelebi b. Ahmed ve gayruhüm.
|