|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 229 Hüküm no: 194 Orijinal metin no: [48a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Zülfikar b. Abdullah’ın hanımını darp edip çocuğunun düşmesine sebep olan Hüseyin Efendi b. Yusuf ile sulh olduğu
Mahmiye-i İstanbul’da Güngörmez mahallesi sâkinlerinden Zülfikār b. Abdullah nâm kimesne kendi tarafından asâleten ve zevce-i menkûhası Timurhan bt. Abdullah nâm hâtun tarafından husûs-ı âti’l-beyâna vekîl olduğu nehc-i şer‘î ve tarîk-i mer‘î üzre sâbit olmağla vekâleten meclis-i şer‘-i şerîfde Tabbâhîn-i hâssa imâmı olan bâ‘is-i hâze’l-kitâb Hüseyin Efendi b. Yusuf nâm kimesne mahzarında üzerine da‘vâ ve takrîr-i kelâm edip târih-i kitâbdan üç gün mukaddem mezbûr Hüseyin Efendi kuyucu Hüseyin Bey nâm kimesnenin menzilin[d]e zevcem müvekkile-i mezbûre Timurhan’ı yumruk ile darb etmekle ol darbdan nâşî zevcem mezbûr[e] Timurhan hâmile olmağla müstebîn-i hılka bir müzekker cenîn meyyit ilkā etmekle hâlâ mezbûr Hüseyin Efendi’ye suâl olunup mûceb-i şer‘iyyesi icrâ olunmak matlûbumdur dedikde gıbbe’s-suâl mezbûr Hüseyin Efendi cevâbında husûs-ı mezkûru bi’l-külliye inkâr ettikden mâ‘adâ müdde‘î-i mezbûr ile zevcesi mezbûre Timurhan bundan akdem husûs-ı mezkûru benden da‘vâ eylediklerinde beynimizde nizâ‘-ı küllî vukū‘undan sonra muslihûn tavassut edip mezbûrân Zülfikār ve Timurhan ile beynimizde beş guruş üzerine inşâ-i akd-i sulh eylediklerinde mezbûrân Zülfikār ve Timurhan rızâlarıyla sulh-ı mezbûr[u] kabûl ve bedel-i sulh olan meblağ-ı mezbûru yedimden ahz u kabz eylediklerinden sonra husûs-ı mezbûra müte‘allik da‘vâdan benim zimmetimi ibrâ ve iskāt etmişler idi deyû def‘ ile mukābele edicek gıbbe’l-istintâk ve’l-inkâr merkūm Hüseyin Efendi’den def‘-i mezbûrunu mübeyyine beyyine taleb olundukda mahalle-i mezbûre ahâlîsinden Mehmed Ağa b. Osman ve Mustafa Çelebi b. Receb ve Mehmed b. Ali nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûrân Zülfikār ve Timurhan bundan akdem husûs-ı mezkûru mezbûr Hüseyin Efendi’den taleb ve da‘vâ eylediklerinde beynlerinde nizâ‘-ı küllî vukū‘undan sonra muslihûn tavassut edip mezbûrân Zülfikār ve Timurhan’ı beş guruş üzerine sulh ettiklerinde mezbûrân Zülfikār ve Timurhan’dan her biri rızâlarıyla sulh-ı mezbûru bizim huzûrumuzda kabûl ve bedel-i sulh olan meblağ-ı mezbûru merkūm Hüseyin Efendi yedinden ahz ettiklerinden sonra husûs-ı mezbûra müte‘allika da‘vâdan mezbûr Hüseyin Efendi’nin zimmetini ibrâ ve iskāt etmişlerdi biz bu husûsa bu vech üzre şâhidleriz, şehâdet dahi ederiz deyû her biri [edâ-i şehâdet-i şer‘iyye] [48b] ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûr ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’t-tâsi‘ aşer min Saferi’l-hayr li sene seb‘a ve semânîn ve elf.
Şuhûdü’l-hâl: Mehmed Çavuş b. İbrahim, Mustafa Çelebi b. İbrahim, Ahmed Çelebi b. Ahmed, İbrahim Çelebi b. Mehmed, Osman Çelebi b. Ömer, Veli Bey b. Mahmud.
|