|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 230 Hüküm no: 195 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaptanıderya Ali Paşa’nın terekesinden hazinedârı Ahmed Ağa b. Abdullah’ın alacağının ödenmesi
Mahmiye-i İstanbul’da Harâccı Kara Mehmed mahallesi sâkinlerinden olup bundan akdem kapudan iken vefât eden merhûm Ali Paşa b. el-merhûm Mustafa Paşa’nın hazînedârı olan bâ‘is-i hâze’l-kitâb Ahmed Ağa b. Abdullah nâm kimesne meclis-i şer‘-i şerîfde merhûm-ı mezbûrun verâseti zevce-i metrûkesi fahrü’l-muhadderât Rukiye Hanım bt. el-merhûm Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîre kızları Aliye Hanım [ve Hümâ Hanım]’a ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ile Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun kethüdâsı Ahmed Ağa b. Ali ve etbâ‘ından Abdülbâkī Ağa b. Ahmed nâm kimesneler şehâdetleri ile şer‘an sâbit olan Ömer Efendi b. Hüseyin nâm kimesne ile mûmâ-ileyh Mehmed Bey mahzarlarında üzerlerine da‘vâ ve takrîr-i kelâm edip müteveffâ-yı mezbûr Ali Paşa’nın hayâtında emri ile kerîmesine cihâz için iştirâ ediverdiğim yorgan ve döşek ve kutnî ve kâğıd bahâlarından zimmetinde yüz otuz guruş hakkım olup hattâ cihet-i mezbûreden zimmetinde bana yüz otuz guruş deyni olduğunu şuhûd mahzarında ikrâr dahi ettiğinden sonra kable’l-edâ merkūm Ali Paşa vefât edip meblağ-ı mezbûr zimmetinde kalmağla hâlâ merkūmân Mehmed Bey ve Ömer Efendi’ye suâl olunup meblağ-ı mezbûru müteveffâ-yı mezbûrun tereke-i vâfiyesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa ile Dîvân efendisi olan Sâlih Efendi b. Süleyman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Paşa hayâtında emri ile müdde‘î-i mezbûr iştirâ ediverdiği mârrü’z-zikr yorgan ve döşek ve kutnî ve kâğıd bahâlarından zimmetinde müdde‘î-i mezbûra vâcibü’l-edâ ve lâzımü’l-kazâ yüz otuz guruş deyni olduğunu bizim huzûrumuzda ikrâr ve bizi işhâd etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince meblağ-ı mezbûr yüz otuz guruşu müteveffâ-yı mezbûr Ali Paşa’nın tereke-i vâfiyesinden müdde‘î-i mezbûr Ahmed Ağa’ya edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin aşer min Saferi’l-hayr li sene seb‘a ve semânîn ve elf.
Şuhûdü’l-hâl: El-Hâc Kemaleddin Kethüdâ-yı Hazret-i Efendi, Hüseyin Çelebi b. Üveys hazînedâr, Musa Çelebi b. Receb, Mustafa Çelebi b. ( ) kahveci, İbrahim Çelebi b. Ahmed ve gayruhüm.
|