|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 231 Hüküm no: 196 Orijinal metin no: [48b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Râbia bt. Mehmed’in câriyesi Vildan bt. Abdullah’ı azat ettiği
Mahmiye-i İstanbul’da Sinan Paşa mahallesinde sâkine Râbia bt. Mehmed nâm hâtunun li ebeveyn kız karındaşı ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân es-Seyyid Sâlih Mehmed Efendi b. Ebûbekir ve Mehmed Efendi b. İsmail nâm kimesneler şehâdetleri ile şer‘an sâbit olan Halil Efendi nâm kimesne meclis-i şer‘-i şerîf-i enverde bi’l-vekâle ikrâr ve takrîr-i kelâm edip müvekkilem mezbûre Râbia Hâtun kendiye rıkk-ı sâbıkını mu‘terife olan işbu uzun boylu açık kaşlı sarı ala gözlü Rûsiyyetü’l-asl bâ‘isetü hâze’l-vesîka Vildan bt. Abdullah nâm câriye-i memlûkesini târih-i kitâbdan iki sene mukaddem malından tahrîr ve i‘tâk ve zümre-i harâir-i asliyyâta idrâc ve ilhâk [49a] etmiş idi hâlâ mevsûfe-i mezkûre Vildan iki seneden beri sâir harâir-i asliyyât gibi hürre olup üzerinde velâ’-i şer‘îden mâ‘adâ kimesnenin hakkı bâkī kalma[mış]dır dedikde mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf.
Şuhûdü’l-hâl: Abdullah Efendi el-İmâm, Yusuf Çelebi b. Abdülmennân, Ömer Çelebi b. İsmail, Mustafa Beşe b. Mehmed, Ömer Bey b. Mehmed, Ali b. Mustafa ve [gayruhüm].
|