|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 232 Hüküm no: 197 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Üftâde bt. Abdullah’ın kocası müneccimbaşı Hasan Efendi’den kalan arsa üzerine yaptırdığı oda ile birtakım eşyalarını Ayşe bt. Şâhin’e hibe ettiği
Mahmiye-i İstanbul’da Sofular mahallesi sâkinelerinden olup zâtı ma‘rifet-i şer‘iyye ile ârifân es-Seyyid Mehmed Efendi b. es-Seyyid Abdülkerim ve Ali Çelebi b. Abdullah nâm kimesneler ta‘rîfleri ile mu‘arrefe olan Üftâde bt. Abdullah nâm hâtun meclis-i şer‘-i şerîfde kezâlik zâtı ma‘rifet-i şer‘iyye ile ârifân mezbûrân es-Seyyid Mehmed Efendi ve Ali Çelebi ta‘rîfleri ile mu‘arrefe olan Ayşe bt. Şâhin nâm hâtun mahzarında ikrâr ve takrîr-i kelâm edip sâbıkan müneccimbaşı oldukdan sonra vedâ‘-ı âlem eden zevcem Hasan Efendi b. el-Hâc Yusuf nâm kimesne mahalle-i mezbûrede vâki‘ bir tarafdan Ahmed Beşe mülkü ve bir tarafdan Ahmed Ağa mülkü ve bir tarafdan vakıf odaları ve bir tarafdan tarîk-i âm ile mahdûd menzilini vakf ve süknâsı evvelen kendiye, ba‘de vefâtihî ile’l-inkırâz evlâdına ve evlâd-ı evlâdına ve evlâd-ı evlâd-ı evlâdına, ba‘de’l-inkırâz zevcesi olmağla menzil-i mezbûrun süknâ ve tevliyyetini bana ve benden sonra utekāsına ve ba‘dehüm Sultan Mehmed muvakkitine şart ve ta‘yîn edip vâkıf-ı mezbûr ve evlâdı münkariz olmağla menzil-i mezbûrun süknâ ve tevliyyeti bana intikāl ettiğinden sonra menzil-i mezbûr muhterik olup arsa sırfa kalmağla üzerine re’y-i hâkimü’ş-şer‘ ile mülküm olmak üzre bir bâb oda binâ ve ihdâs etmiş idim hâlâ ber vech-i muharrer arsa-i mezbûre üzerinde olan ebniye-i mezkûreyi ve bir benefşe çuka ferâce ve bir mâ’î atlas kaftan ve bir tencere ve bir tava ve bir minder ve iki yastık ve sâkine olduğum menzil içinde olan esâs-ı beyt ve evânî-i nühâsiyye ism-i mâl ıtlâk olunur eşyâmın cümlesini mezbûre Ayşe Hâtun’a hibe-i sahîha-i şer‘iyye ile hibe ve teslîm ol dahi meclis-i hibede ittihâb ve kabûl edip ve arsa-i mezbûreyi mezbûre Ayşe’ye bi tarîki’l-âriye teslîm ol dahi kabz [ve] tesellüm eyledi ba‘de’l-yevm arsa-i mezbûre üzerinde mebnî olan bir bâb mülk oda ve eşyâ-i merkūme mezbûre Ayşe Hâtun’un emlâk-i mevhûbesidir, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min Saferi’l-hayr li sene seb‘a ve semânîn ve elf.
Şuhûdü’l-hâl: Seyyid Mehmed Efendi b. Seyyid Abdülkerim, Ali Beşe b. Abdullah, diğer Ali b. Abdullah, Durmuş Çelebi b. Mehmed, Hüseyin Çelebi b. Sinan.
|