|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 233 Hüküm no: 198 Orijinal metin no: [49a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kastamonulu Mehmed ve Şaban’ın önceden köylerinin subaşısı olup kendilerinden haksız yere bir inek ve para alan es-Seyyid Veli Çelebi ile sulh oldukları
Fi’l-asl vilâyet-i Anadolu’da Kastamonu sancağında Daday? kazâsına tâbi‘ Erkâmil nâm karye ahâlîsinden olup mahmiye-i İstanbul’da Dülgerzâde mahallesi sâkinlerinden Mehmed ve Şaban ibney Atâullâh nâm kimesneler meclis-i şer‘-i şerîfde es-Seyyid Veli Çelebi b. es-Seyyid Zülfikār nâm kimesne mahzarında her biri ikrâr ve takrîr-i kelâm edip târih-i kitâbdan beş sene mukaddem karye-i mezbûrede subaşı iken siz mal bulmuşsunuz, bana verin deyû bizden bi gayri hakkın on beş guruş kıymetli bir su sığır ineği ile üç zolotamızı almağla bundan akdem taleb ve da‘vâ ettiğimizde, ol dahi cevâbında karye-i mezbûre sâkinlerinden karındaşınız oğlu olan Ali b. Süleyman nâm kimesne zikr olunan su sığır ineği kendi mülkü olmak üzre benden da‘vâ eyledikde ben dahi mezbûr Ali’ye zikr olunan su sığır ve meblağ-ı mezbûr mukābelesinde bir kara sığır ineği verip sulh olmuşdum demekle, beynimizde nizâ‘-ı küllî vukū‘undan sonra muslihûn tavassut edip mezbûr es-Seyyid Veli Çelebi ile beynimizde altı buçuk esedî guruş üzerine inşâ-i akd-i sulh ettiklerinde biz dahi sulh-ı mezbûru kabûl ve bedel-i sulh olan altı buçuk guruşu mezbûr es-Seyyid Veli Çelebi yedinden tamâmen ahz u kabz eylediğimizden sonra zikr olunan su sığırı ve üç zolotaya müte‘allika âmme-i de‘âvîden biz mezbûr es-Seyyid Veli Çelebi’nin zimmetini ibrâ ve iskāt edip mezbûr es-Seyyid Veli Çelebi dahi mezbûr Ali’ye def‘ ve teslîm eylediği kara sığır ineğine ve bedel-i sulh olan altı buçuk guruşa müte‘allika âmme-i de‘âvîden mezbûr Ali’nin zimmetini ve bizim zimmetimizi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Saferi’l-hayr li sene seb‘a ve semânîn ve elf.
Şuhûdü’l-hâl: Mustafa Efendi b. İbrahim, Mustafa Efendi b. Mehmed Efendi, Abdullah Çelebi b. Mustafa Efendi, Seyyid Mustafa b. Ahmed, Mehmed Çelebi b. Fazlı, Ahmed Çelebi b. Maksud Efendi.
|