|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 234 Hüküm no: 199 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kâtibe bt. Abdullah’ın evini, kocası Hüseyin Beşe’ye sattığı
Mahmiye-i İstanbul’da Çıkrıkçı Kemal mahallesinde sâkine Kâtibe bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Osman Ağa b. Kemal ve Seyyid Musa Efendi b. Seyyid Mehmed nâm kimesneler şehâdetleri ile şer‘an sâbit olan Mehmed Çelebi b. Ali nâm kimesne meclis-i şer‘-i şerîfde müvekkile-i mezbûrenin zevci işbu bâ‘isü’l-kitâb Hasan Beşe b. Receb nâm kimesne mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Kâtibe Hâtun yedinde mülk ve hakkı olup mahmiye-i mezbûrda Sufılar mahallesinde vâki‘ bir tarafdan Medîne-i Münevvere fukarâsına meşrût olan menzil ve bir tarafdan Hüseyin Beşe mülkü ve bir tarafdan Mustafa Çelebi mülkü ve bir tarafdan tarîk-i âm ile mahdûd dâhiliyyesinde fevkānî bir oda ve bir sofa ve bir kiler ve tahtânî bir bâb oda ve bir sofa ve bi’r-i mâ ve cüneyne ve hâriciyyesinde fevkānî bir bâb oda ve bir sofa ve havluyu müştemil mülk menzilini, cemî‘ tevâbi‘ ve levâhıkıyla zevci mezbûr Hasan Beşe’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile üç yüz esedî guruşa bey‘ ve teslîm ol dahi ber vech-i muharrer iştirâ ve tesellüm ettikden sonra semeni olan meblağ-ı mezbûr üç yüz esedî guruşu mezbûr Hasan Beşe yedinden tamâmen ahz u kabz eyledi ba‘de’l-yevm menzil-i mahdûd-ı mezkûr merkūm Hüseyin Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Saferi’l-hayr li sene seb‘a ve semânîn ve elf.
Şuhûdü’l-hâl: Seyfullah Efendi b. Osman el-İmâm, Ali Ağa b. Osman, es-Seyyid Mehmed Efendi b. Musa, Osman Ağa b. Receb, Mehmed b. Şaban, Hasan Bey b. Abdullah, Ali Beşe b. Abdullah, Murad Terzi b. Hasan, Mehmed Bey b. Hasan ve gayruhüm.
|