.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 234
Hüküm no: 200
Orijinal metin no: [49b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Havvâ bt. Abdüsselâm’ın Osman Ağa b. Mehmed’e sattığı Bitpazarı’ndaki hanının parasını vekili İdris Çelebi’den tam olarak aldığı

Husûs-ı âti’l-beyânın mahallinde tahrîri iltimâs olunmağın kıbel-i şerîf-i garrâdan Mevlânâ Mustafa Efendi b. Abdülaziz irsâl olunup ol dahi Havvâ bt. Abdüsselâm nâm hâtunun mahmiye-i İstanbul’da Kaliçeci Hasan mahallesinde sâkine olduğu menziline varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde zâtı ma‘rifet-i şer‘iyye ile ârifân zevci İmâm Mehmed Efendi b. Abdülgaffâr ve Mustafa Efendi b. Hasan nâm kimesneler ta‘rîfleri ile mu‘arrefe olan mezbûre Havvâ Hâtun meclis-i ma‘kūd-ı mezbûrda, bâ‘is-i hâze’l-kitâb İdris Çelebi b. Yahya nâm kimesne mahzarında ikrâr-ı tâm ve takrîr-i kelâm edip mezbûr İdris Çelebi’yi mahmiye-i merkūme esvâkından Bitpazarı kurbunda Ali Paşa-yı Cedîd hanı yanında vâki‘ lede’l-ahâlî ve’l-cîrân ma‘lûmü’l-hudûd mülk hanını, semen-i misli ile âhara bey‘a ve semenini kabz ve bana îsâle ve kabz ve îsâle mütevakkıf olduğu umûrun küllîsine tarafımdan mezbûr İdris Çelebi’yi bundan akdem vekîl ve nâib-i menâb nasb ve ta‘yîn edip ol dahi kabûl ettikden sonra zikr olunan hanı vekâlet-i mahkiyesi hasebiyle semen-i misli olan sekiz bin üç yüz guruşa Osman Ağa b. Mehmed nâm kimesneye bey‘ ve teslîm ve semeni olan meblağ-ı mezbûr sekiz bin üç yüz esedî guruşu mezbûr Osman Ağa yedinden tamâmen ahz u kabz ettikden sonra meblağ-ı mezbûr sekiz bin üç yüz esedî guruşu bana def‘ ve teslîm ben dahi merkūm İdris Çelebi yedinden tamâmen ahz u kabz eyledim ba‘de’l-yevm hân-ı mezbûr semeninden vekîl-i mezbûr İdris Çelebi yedinde bir akçe ve bir habbe bâkī kalmadı dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Mehmed b. Şaban ile meclis-i şer‘a gelip alâ vukū‘ihi inhâ etmeğin mâ vaka‘a bi’t-taleb ketb ü tahrîr olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf. [Şuhûdü’l-hâl]: Es-Seyyid Abdurrahman Efendi b. Ahmed, Mehmed Odabaşı b. Osman, Yusuf Efendi b. Ahmed, Mehmed Çelebi b. İbrahim, Ahmed Beşe b. Abdullah, Bayram Beşe b. Abdullah ve gayruhüm.