|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 238 Hüküm no: 202 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Borcu miras malından fazla olarak vefat eden el-Hâc Fazlı b. Mehmed’in malından, Mehmed Ârif’e olan borcunun tahsil edildiği
Mahmiye-i İstanbul’da Kâtib Kasım mahallesinde sâkin iken bundan akdem vefât eden el-Hâc Fazlı b. Mehmed’in sulbî sagīr oğlu Mehmed Ârif’in tesviye-i umûruna kıbel-i şer‘den mansûb vasîsi olan İbrahim b. Ali nâm kimesne meclis-i şer‘-i şerîfde mahmiye-i mezbûrda Çakır Ağa mahallesinde sâkin iken bundan akdem düyûnu terekesinden ezyed olduğu hâlde vefât eden Abdullah Çelebi b. Abdullah’ın verâseti zevce-i metrûkesi Ümmühâni bt. es-Seyyid Alâaddin nâm hâtun ile sulbiye kızı Hatice ve mu‘tıkı mezbûr es-Seyyid Alâaddin Çelebi’ye münhasıra olduğu şer‘an zâhir ve müte‘ayyin oldukdan sonra kendi tarafından asîl ve sagīre-i mezbûrenin tesviye-i umûruna kıbel-i şer‘den mansûb vasîsi olan bâ‘is-i hâze’l-kitâb mezbûr es-Seyyid Alâaddin Çelebi mahzarında bi’l-vesâye ikrâr ve takrîr-i kelâm edip müteveffâ-yı mezbûr Abdullah Çelebi’ye hâl-i sıhhatinde vasîsi olduğum sagīre-i mezbûre malından ikrâz ve teslîm ol dahi yedimden iktirâz ve tesellüm eylediği üç yüz esedî guruşun yüz kırk guruşunu müteveffâ-yı mezbûrun hayâtında ahz u kabz edip yüz altmış esedî guruşu zimmetinde bâkī iken fevt olmağla meblağ-ı bâkī-i mezbûru müteveffâ-yı mezbûrun tereke-i müstağrakasından bundan akdem mezbûr es-Seyyid Alâaddin Çelebi’den taleb ve da‘vâ ettiğimden ol dahi inkâr etmekle udûl-i müslimîn ile müdde‘âmı isbât ve tahlîf-i şer‘î ile tahlîf olunduğumdan sonra ber mûceb-i defter-i kassâm müteveffâ-yı mezbûrun tereke-i müstağrakasından guremâma isâbet eden on bir bin dokuz akçeyi mezbûr es-Seyyid Alâaddin Çelebi yedinden tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Saferi’l-hayr li sene seb‘a ve semânîn ve elf.
Şuhûdü’l-hâl: İbrahim Çelebi b. Ahmed, Osman Çelebi b. Ömer, Ebûbekir b. Hüseyin, Veli Bey b. Mahmud, Muharrem b. Mehmed, Hüseyin Çelebi b. Mehmed.
|