|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 238 Hüküm no: 203 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat etmiş olan Mehmed b. Abdürrahim’in vârislerinden, Kasım b. Cuma’nın hakkının alındığı
Mahmiye-i İstanbul’da Şeyh Muhyiddin Kocavî mahallesinde sâkin iken bundan akdem vefât eden Mehmed b. Abdürrahim nâm sagīrin verâseti vâlidesi Safiye bt. Abdullah nâm hâtun ile li üm kız karındaşı Fâtıma bt. Mustafa nâm sagīre ve li ebeveyn ammisi Kasım b. Cuma nâm kimesneye münhasıra olduğu şer‘an sâbit oldukdan sonra mezbûr Kasım tarafından husûs-ı âti’l-beyâna vekîl olduğu yedinde olan mazmûnu müsbit hüccet-i şer‘iyye ile sâbit olan diğer Kasım b. el-Hâc Mehmed nâm kimesne meclis-i şer‘-i şerîfde müteveffâ-yı mezbûrun hayâtında tesviye-i umûruna kıbel-i şer‘den mansûb vasîsi olmağla terekesine vâzı‘ü’l-yed olan râfi‘-i hâze’l-kitâb el-Hâc Said b. Mehmed nâm kimesne mahzarında ikrâr ve takrîr-i kelâm edip vasiyy-i mezbûr el-Hâc Said müteveffâ-yı mezbûrun terekesinden ber mûceb-i defter-i kassâm makbûzu olan on sekiz bin beş yüz elli yedi akçeden müvekkilim mezbûr Kasım’ın hisse-i şer‘iyyesi olan dokuz bin iki yüz yetmiş altı akçeyi bana def‘ ve teslîm ben dahi bi’l-vekâle ahz u kabz ettiğimden sonra müteveffâ-yı mezbûr Mehmed’in terekesine müte‘allika da‘vâdan vasiyy-i merkūm el-Hâc Said’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Saferi’l-hayr li sene seb‘a ve semânîn ve elf.
Şuhûdü’l-hâl: El-Hâc İsâ b. Abdurrahman, el-Hâc Abdullah b. İsâ, İsâ b. Ahmed, Azmi b. Ali, Şaban b. Mansur, Sâlih Çelebi b. Abdülmümin, İsâ b. Aziz, el-Hâc Ali b. el-Hâc Mansur, Şeyh Kasım.
|