|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 243 Hüküm no: 208 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaybolan Rus asıllı İvaz adlı kölenin esas sahibi olan Sâlih Paşa mahallesinden Veli Ağa’ya verilmesi
Mahmiye-i İstanbul’da Sâlih Paşa mahallesinde sâkin Veli Ağa b. Ahmed nâm kimesne meclis-i şer‘de, Mustafa Beşe b. Mehmed nâm kimesne mahzarında üzerine da‘vâ ve takrîr-i kelâm edip işbu açık kaşlı ala gözlü Rûsiyyü’l-asl İvaz nâm sagīr gulâmı târih-i kitâbdan beş ay mukaddem altmış esedî guruş an makbûza mahmiye-i mezbûrede Mehmed Beşe nâm kimesneden iştirâ ve kabz ettikden sonra mülkümden zâyi‘ olmuş idi hâlâ mezbûr Mustafa Beşe yedinde bulunmağla suâl olunup mevsûf-ı mezbûru bana teslîme tenbîh olunmak matlûbumdur dedikde gıbbe’s-suâl mezbûr Mustafa Beşe cevâbında mevsûf-ı mezbûru târih-i mezbûrdan on günden sonra mahrûse-i Edirne’de sarrâf Süleyman Beşe nâm kimesneden semen-i makbûz altmış esedî guruşa iştirâ ve kabz eyledim mülk-i müşterâm olmağla vaz‘-ı yed ederim, müdde‘î-i merkūmun mülkü olduğu ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden Mustafa Bey b. Mehmed ve Şaban Bey b. Murad ve Mehmed Bey b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mevsûf-ı mezbûr müdde‘î-i merkūmun müşterâsıdır, târih-i mezkûrda mülkünden zâyi‘ olmuş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince mevsûf-ı mezbûr İvaz’ı müdde‘î-i merkūm Veli Ağa’ya def‘ ve teslîme mezbûr Mustafa Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Saferi’l-hayr li sene seb‘a ve semânîn ve elf. Şuhûd[ü’l-hâl]: İbrahim Beşe b. ( ), Ömer Ağa b. ( ), sarrâf İbrahim Beşe b. ( ), İbrahim Çelebi b. Mehmed.
|