.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 308
Hüküm no: 287
Orijinal metin no: [73a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed b. Ali’nin altı adet beygirini satın alan at cambazları Hasan, Receb, Ramazan ve Mehmed’in satıştan kalan borçlarını kabul ettikleri

Mahmiye-i İstanbul’da Sofular mahallesi sâkinlerinden bâ‘is-i hâze’l-kitâb Mehmed b. Ali nâm kimesne meclis-i şer‘-i şerîfde mahmiye-i mezbûrede Ebâ Eyyûb-i Ensârî kapısı dâhilinde Koca Mustafa Paşa mahallesi sâkinlerinden olup canbâz tâ’ifesinden olan Hasan b. Mehmed ve Receb b. Abdullah ve Ramazan b. Yusuf ve Mehmed b. Cafer nâm kimesneler mahzarlarında üzerlerine da‘vâ ve takrîr-i kelâm edip mezbûrun Hasan ve Receb ve Ramazan ve Mehmed bundan akdem ale’l-iştirâki’s-seviy yedimden iştirâ ve kabz ettikleri altı re’s bârgir bahâlarından zimmetlerinde yüz yirmi guruş hakkım olmağla hâlâ mezbûrûna suâl olunup meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl mezbûrûn Hasan ve Receb ve Ramazan ve Mehmed cevâblarında, kaziyye minvâl-i muharrer üzre olup zikr olunan altı re’s bârgir bahâlarından zimmetlerinde müdde‘î-i mezbûre vâcibü’l-edâ ve lâzımü’l-kazâ yüz yirmi guruş deynleri olduğunu her biri ikrâr ve i‘tirâf etmeğin alâ mûcebi i‘tirâfihim meblağ-ı mezbûr yüz yirmi guruşu müdde‘î-i mezbûre edâ ve teslîme merkūmûna tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf.


Şuhûdü’l-hâl: Fahrü’l-akrân el-Hâc Kemaleddin, el-Hâc Mehmed b. Ali, el-Hâc Mehmed b. Ahmed, Musa Halîfe b. Receb