|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 322 Hüküm no: 307 Orijinal metin no: [78a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Şaban b. Abdullah’ın gasbetmiş olduğu evi asıl sahibi Mustafa Çelebi b. Çalık Osman’a teslim etmesi gerektiği
Mahmiye-i İstanbul’da Hoca Üveys mahallesi sâkinlerinden bâ‘is-i hâze’l-kitâb Mustafa Çelebi b. el-merhûm Çalık Osman Ağa dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde mahrûse-i Galata müzâfâtından kasaba-i Kasımpaşa’da Sirkeci Muslihiddin mahallesinde vâki‘ zikri âtî menzile vâzı‘ü’l-yed olduğu şer‘an mütehakkik olan el-Hâc Şaban b. Abdullah nâm kimesne mahzarında üzerine da‘vâ ve takrîr-i kelâm edip mezbûr el-Hâc Şaban zikr olunan Sirkeci Muslihiddin mahallesinde vâki‘ bir tarafdan mezbûr el-Hâc Şaban’ın mülkü olan menzil ve bir tarafdan ba‘zan Hatice Hâtun bt. Abdullah mülkü ve ba‘zan zikr olunan Sirkeci Muslihiddin mahallesi imâmına ve müezzinine meşrûta menzil ve bir tarafdan Bıyıklı Hasan Ağa’nın mülkü olan bahçe ve bir tarafdan tarîk-i hâs ile mahdûd fevkānî üç bâb oda ve bir sofa ve bir matbah ve bir kenîf ve tahtânî üç bâb oda ve matbah ve havlu ve bi’r-i mâ ve kenîf ve zât-ı eşcâr bahçeyi müştemil menzili, bin seksen senesi şehri Rebî‘ulevveli’nin yirmi beşinci günü mâliki olan el-Hâc Selim b. İbrahim nâm kimesneden benim malım ile alınıp elli esedî guruşa benim için tarafımdan bi’l-vekâle iştirâ ve tesellüm edip târih-i mezbûrdan beri menzil-i mahdûd-ı mezbûr benim mülküm ve hakk-ı sarfım olmuşken, hâlâ mezbûr el-Hâc Şaban menzil-i mezbûru gasben zabt ve kendi üzerine hüccet ettirip benim tasarrufuma mâni‘ olup mezbûr el-Hâc Şaban’a <> [78b] suâl olunup menzil-i mezbûrdan kasr-ı yed edip bana teslîme mezbûr el-Hâc Şaban’a tenbîh olunmak matlûbumdur dedikde gıbbe’s-suâl mezbûr el-Hâc Şaban cevâbında menzil-i mahdûd-ı mezbûru târih-i mezbûrda mâliki olan mezbûr el-Hâc Selim’den kendi malım ile kendim için iştirâ ve tesellüm ettiğimden mâ‘adâ mezbûr Mustafa Çelebi bin seksen beş senesi şehri Rebî‘ulevveli’nin yirminci günü cereyân eden mu‘âmelât-ı şettâya müte‘allika da‘vâdan benim zimmetimi ibrâ-i âm ile ibrâ edip yedimde hüccet-i şer‘iyye dahi verilmekle yedimde olan fetvâ-yı şerîfe mûcebince mezbûr Mustafa Çelebi’nin menzil-i mezbûru ber vech-i muharrer da‘vâsı mesmû‘a olmaz deyû hâlâ şeyhülislâm-ı müfti’l-enâm hallâlü’l-müşkilâti’d-dîniyye keşşâfü’l-müfassalâti’l-yakīniyye ferîdü’d-dehr ve vahîdü’l-asr sa‘âdetlü Ali Efendi hazretlerinin imzâ-yı şerîfleri ile mümzât bir kıt‘a fetvâ-yı şerîfe ibrâz edip mazmûnunda Zeyd Amr ile aslâ da‘vâm yoktur deyû Amr’ı ibrâ-i âm ile ibrâ ettiğinden sonra Zeyd Amr’ın yedinde olan bahçe için bahçe mülküm olup kable’l-ibrâz benden tagallüben almışdın deyû Amr’dan da‘vâ ile mesmû‘a olur mu, el-cevâb olmaz deyû buyurulmağın mezbûr Mustafa Çelebi’ye suâl olundukda mezbûr Mustafa Çelebi dahi cevâbında ber vech-i muharrer ibrâyı inkâr ettiğinden mâ‘adâ mezbûr el-Hâc Şaban târih-i mezbûrdan beş ay sonra menzil-i mahdûd-ı mezbûru benim malım ile benim için bi’l-vekâle iştirâ edip menzil-i mezbûr benim mülküm [ve] kendinin alâkası olmadığını şuhûd mahzarında ikrâr dahietmiş idi deyû sa‘âdetlü müşârün-ileyh hazretleri imzâ-i şerîfleri ile mümzât bir kıt‘a fetvâ-yı şerîfe ibrâz edip mazmûnunda Zeyd Amr’ın yedinde olan akār için mülküm olup gasben zabt edersin deyû da‘vâ ettikde Amr sen falan târihde beni cemî‘ de‘âvîden ibrâetmiş idin deyû da‘vâ ve Zeyd inkâr edip Amr müdde‘âsına ikāmet-i beyyine ettiğinde Zeyd sen ol târihden-sonra ol akār benim mülküm olup alâkan olmadığını ikrâretmiş idin deyû da‘vâ ve Amr’ın ikrâr-ı meşrûhuna ikāmet-i beyyine edicek Amr’ı def‘a kādir olur mu, el-cevâb olur deyû buyurulmağın mezbûr el-Hâc Şaban’a suâl olundukda ol dahi ber vech-i muharrer ikrâr etmeğin müdde‘î-i mezbûrdan merkūm el-Hâc Şaban’ın vech-i muharrer üzre ikrârına beyyine taleb olundukda mahmiye-i mezbûrede Cerrâhpaşa câmi‘-i şerîfi kurbunda Kürkçübaşı mahallesi sâkinlerinden el-Hâc Hasan b. Abdullah ve kasaba-i Fındıklı’da Molla Çelebi mahallesi ahâlîsinden ayyum Mehmed Efendi b. Muharrem nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm el-Hâc Şaban bin seksen beş senesi şehri Rebî‘ulevveli’nde beş ay sonra zikr olunan Sirkeci Muslihiddin mahallesinde vâki‘ mezbûr el-Hâc Şaban’ın mülkü olan menzil ve bir tarafdan ba‘zan Hatice Hâtun bt. Abdullah mülkü ve ba‘zan zikr olunan Sirkeci Muslihiddin mahallesi imâmına ve müezzinine meşrûta menzil ve bir tarafdan Bıyıklı Hasan Ağa’nın mülkü olan bahçe ve bir tarafdan tarîk-i hâs ile mahdûd fevkānî üç ve sofa ve bir matbah ve kenîf ve tahtânî üç bâb oda ve bir matbah ve havlu ve bi’r-i mâ ve kenîf ve zât-ı eşcâr bahçeyi müştemil menzili, mezbûr Mustafa Çelebi’nin malı ile mezbûr Mustafa Çelebi için bi’l-vekâle iştirâ edip mezbûr Mustafa Çelebi’nin mülkü olup kendinin alâkası olmadığını bizim huzûrumuzda ikrâr ve bizi işhâdetmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı [79a] mezbûrân el-Hâc Hüseyin ve Mehmed Efendi’nin keyfiyyet-i hâllerini suâl için savb-ı şer‘den irsâl olunan Mevlânâ Mustafa Efendi b. Abdülaziz şâhidân-ı mezbûrânın sâkin oldukları mahalleleri ahâlîleri udûlünden cem‘-i kesîrden keyfiyyet-i hâllerini suâl eyledikde her biri şâhidân-ı mezbûrân adl ve makbûl-i şehâdedir velev aleynâ deyû haber verdiklerini mahallinde tahrîr ve ma‘an irsâl olunan Ebûbekir b. Hüseyin ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olduklarından sonra şehâdetleri makbûle olmağın mûcebince menzil-i mahdûd-ı mezbûru kasr-ı yed edip müdde‘î-i mezbûr Mustafa Çelebi’ye teslîm etmeğe mezbûr el-Hâc Şaban’a tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Muharremi’l-harâm li sene seb‘a ve semânîn ve elf.
Şuhûdü’l-hâl: Umdetü erbâbü’t-tahrîr ve’l-kalem Hasan Efendi tezkire-i ûlâ, mefharü’l-eşbâh ve’l-ekfâ çavuşbaşı Murad Ağa, umdetü’l-emâsil ve’l-e‘âlî muhzır Kasım Ağa, fahrü’l-akrân el-Hâc Kemaleddin Kethüdâ-yı Hazret-i Efendi, muhzırbaşı Receb Ağa, el-Hâc Kasım b. Receb
|