Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 216 Hüküm no: 330 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mustafa'nın Adalar kazasına yeniçeri serdarı tayin edildiği Şerî‘at-şi‘âr Adalar kādısı efendi -zîde fazluhû- ba‘de’t-tahiyye ve’s-selâm inhâ olunur ki, taht-ı kazânızda vâki‘ yeniçeri serdârı ref‘ olunup yerine üslûb-ı sâbık üzere kırk dört bölük yoldaşlarından Kara Mustafa nasb ü ta‘yîn olunmağın işbu mektûb tahrîr ve irsâl olundu. Vusûlünde gerekdir ki mezbûru serdârlık umûrunda istihdâm olunup âharı dahl etdirmeyesiz ve ol cânibde vâki‘ yeniçeri ve cebeci ve topçu ve gılmân-ı acemî ve kuloğulları, merkūmu üzerlerine serdâr ve zâbit bilip sözünden taşraya ve re'yinden hâric vaz‘ ve hareket etmeyip itâ‘at ve inkıyâd üzere olalar ve tavâif-i mezbûreden bilâ-vâris-i ma‘rûf fevt olanların muhallefât ve metrûkâtların ma‘rifet-i şer‘le merkūma ahz u kabz ve sûk-ı sultânîde fürûht ve hâsıl olan nükūdu mümzâ ve mahtûm defterleriyle bu cânibe irsâl etdirile ve lâkin hilâf-ı şer‘ bir ferde rencîde vü remîde etdirilmeye, bâkī ve’s-selâm. Tahrîren fî-evâhiri Zilka‘de sene selâse ve ışrîn ve mi'e ve elf. el-Hâc Mehmed, Ağa-yı Yeniçeriyân-ı Dergâh-ı âlî. Vasale ileynâ fî 18 Zilhicce sene [1]123