Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 216 Hüküm no: 331 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin'in bağ ve evini oğluna hibe etmesi Medîne-i Üsküdar muzâfâtından Adalar nâhiyesine tâbi‘ Kartal karyesi ahâlîsinden el-Hâc Hüseyin b. Mehmed Beşe tarafından husûs-ı âti’l-beyânda vekîl olduğu Mehmed b. Salih ve Veli b. Mustafa şehâdetleriyle sâbit ve sübût-ı vekâlete hükm-i şer‘î lâhık olan İbrahim Bey b. Ali meclis-i şer‘de işbu bâ‘isü’l-kitâb mezbû[r] el-Hâc Hüseyin’in sulbî oğlu Mustafa mahzarında bi’l-vekâle tav‘an ikrâr-ı tâm ve takrîr-i kelâm edip müvekkilim mezbûr el-Hâc Hüseyin’in silk-i mülkünde münselik olup karye-i mezbûrede vâki‘ bir tarafı Ak Mahmud oğlu tarlası bir tarafı yine mezbûr Ak Mahmud oğlu bağı iki tarafı tarîk-i âm ile mahdûd ve mümtâz tahmînen on iki bin çubuk yüz guruş kıymetli mülk hora bağımı ve yine karye-i mezbûrede vâki‘ bir tarafı Cemal [b.] Ahmed menzili bir tarafı Mutaf? menzili iki tarafı tarîk-i âm ile mahdûd ve mümtâz üç oda ve havluyu müştemil elli guruş kıymetli mülk menzili ba‘de’t-tahliyeti’ş-şer‘iye cümle-i tevâbi‘ ve levâhıkı ile işbu müvekkilim mezbûr el-Hâc Hüseyin’in oğlu merkūm Mustafa’ya bi’l-vekâle hibe-i sahîha-i şer‘iye ile hibe ve teslîm edip merkūm Mustafa dahi meclis-i hibede ittihâb ve tesellüm ve kabûl eyledikden sonra semenleri olan meblağ-ı mezbûr yüz elli guruşdan mezbûr Mustafa’nın zimmetini ibrâ ve ıskāt eyledim, fîmâ-ba‘d bağ-ı mahdûd-ı mezbûr ve menzil-i mahdûd-ı mezbûrda merkūm el-Hâc Hüseyin’in kat‘â alâka ve medhali kalmayıp oğlum mezbûr Mustafa’nın mülk-i mevhûbesi olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-evâili Zilka‘de sene [1]123 Şuhûdü’l-hâl: Müezzin Ali b. Mustafa, Hüseyin b. Halil, Veli b. Mustafa, Mehmed Beşe b. Salih, İzmidli Ahmed Beşe b. Mustafa, Ahmed b. İsmail, Halil b. İsmail, Ahmed Beşe b. Mustafa, Nasuh b. Mehmed.